Ubona iWits izoba umjovo wokuvuka
BONKE abasondelene neMaritzburg United bakuqonda kahle ukuthi iwini kwiBidvest Wits koweTelkom Knockout kusasa ngo-8.15 ebusuku eHarry Gwala Stadium, eMgungundlovu, izoba wumjovo ekutheni kujike izinto endleleni iqembu eliqale ngayo isizini ka-2018/2019.
Lawa amazwi ashiwo uBokang Thlone (osayine kwiMaritzburg esuka kwiWits) awasho ngoLwesithathu beqeda ukwenza amalungiselelo okugcina okubhekana nezikaGavin Hunt kwi-quarter final yalo mqhudelwano, ozosongwa ngoDisemba eNelson Mandela Bay Stadium, ePort Elizabeth.
ITeam of Choice ingelinye lamaqembu abengundabuzekwayo ngesizini edlule lapho abafana bakaFadlu Davids bebecoboshisa kwasani. Yilapho kuvele namathalente kuLebohang Maboe osephenduke isethenjwa kwiMamelodi Sundowns noSiphesihle Ndlovu osebizwa njalo kwiBafana Bafana.
Ngakho ukushaya elinenkosi phakathi leli qembu laseMphithi liqede endaweni yesihlanu kwi-log. Ngesizini edlule nakwiNedbank Cup lilihambe lonke ibanga labhajwa kowamanqamu lakhala ngaphansi kwiFree State Stars.
Ayizange iyiqale kahle isizini kulokhu njengoba iTeam of Choice isaphumelele ukunqoba umdlalo owodwa kweyisishiyagalombili esiyidlalile. Akumphethe kahle uThlone ukuthi iqembu lakhe lisashaye amagoli amabili kuphela kodwa langenelwa amahlanu.
Lisendaweni yesithathu uma usuka emsileni ngamaphuzu ayisikhombisa, okusho ukuthi lisele ngawu13 kwiWits (abadlala nayo) okuyiyona eqhwakele.
“IWits iqale kahle impela kwiligi kodwa njengoba sibhekene nayo kwiTelkom Knockout umdlalo uzobe uhluke kakhulu ngoba sonke sifuna into efanayo. Akufani nakwiligi. Siyazilungisa kahle ngendlela ukuze umdlalo uzofika silindile. Kusemqoka ukunqoba lapha ngoba lokhu kuzoba umjovo kithina. IWits iqhwakele ngakho ukuyehlula kuzosenza siziqhenye okuzobe kusinika amandla okuthi siguqule izinto endleleni esiqale ngayo kule sizini,” kusho lo mdlali oseke wagijima nakwiFree State.
Ukholwa ukuthi uma bezokwenza konke okufanele ngendlela bese besizana njengozakwabo uma kudingeka, noma kanjani bazoyiguqisa iWits.