I-DMax igabadula izintaba kalula
BATHI bafeze isifiso sabathengi babo abakwaIsuzu ngokushintsha i-Isuzu KB yaba yi-Isuzu D-MAX efike iyizinhlobo ezahlukene futhi elungele lonke uhlobo lomsebenzi.
Igama layo elisha iD-MAX livele liyasetshenziswa emazweni angaphandle.
Ukuzethemba kwabakaIsuzu ngale moto kubonakale ngesikhathi yethulwa ngokusemthethweni esifundazweni iMpumalanga ngoMsombuluko njengoba benqume ukuthi abashayeli bayihambise ezintabeni okubukeka kunzima ukuthi kungahamba imoto kuzona kodwa ivele yazihambela kalula kuzona ngaphandle kokuzwela ubunzima.
Ukungabi kuhle komgwaqo ibingakushayi mkhuba njengoba ibizihambela engathi ihamba emgwaqweni ojwayelekile, futhi ingazweli ngisho ishaya ezikhisini.
Leli veni liphume laba yizinhlobo ezingu-30 abathengi abangakhetha kuzo njengoba kukhona eliyi-Single Cab, Extended Cab neliyiDouble Cab. Izinto ezengezwe kule moto, abakwaIsuzu bathe zifunwe abathengi babo. Bathe yize bezengezile kodwa abakhohlwanga ukuqinisekisa ezokuphepha uma uhamba ngayo.
Lokho kucace ngokuthi umgwaqo ebezihanjiswa kuwona ngesikhathi zihlolwa ubunezigodi kodwa bekuzwakala kuphephile uma uhamba ngayo.
Bathe noma kumele abashayeli baziqaphele izigodi emgwaqweni kodwa bangabi nalo uvalo uma kwenzekile le moto yanyathela umgodi ngoba inamathayi amakhulu futhi aqinile ukumelana nobunzima.
Kukhona izikhathi lapho ibihamba phezu kwayo imigodi kodwa bekungazwakali ngisho uwunyathelile uma ungumshayeli ngenxa yokuthi yakhiwe yantofontofo.
Nasohlwalaneni ayishibiliki kalula. Bekudingeka ukuthi ube nesibindi ngokuyigijimisa kulona ukuze ubone ukuthembeka kwayo noma ihamba kulona.
Uyathuka indlela egxuma ngayo uma igibele igquma igijima ngoba kuvele kube sengathi iyandiza kodwa indlela enamathela ngayo phansi uma ibuya phezulu yenza kwehle amaphaphu ngoba kuyezwakala ukuthi imoto ephephile futhi ihlala kamnandi kungazweli kumgibeli.
Ezokuphepha zihlanganisa amabhreki e-ABS kuthi iLX ibe naneBrake Override System. Okunye yi-Electronic Stability Control, Traction Control, Trailer Sway Control, Hill Start Assist neHill Descent Control.
ISingle Cab, okunezinhlobo ezingu-16, imlungele kakhulu umuntu onebhizinisi futhi iyakwazi ukumelana nanoma iluphi uhlobo lomsebenzi futhi ayizweli.
Kukhona enenjini engu-2.5 litre enamandla angu-58 kW netorque engu-176 Nm bese kuba nenye nayo engu-2.5 litre kodwa enamandla angu-100 kW netorque engu-320 Nm.
I-extended cab yona ihlukene ngezinhlobo ezine. Kukhona i-2.5 hi-Rider nama-3.0 LX amabili okwazi ukukhetha kuwo ukuthi ufuna eno-gearbox iyi six-speed manual noma i-automatic.
Kumele ngikugqamise ukuthi lona ngu-gearbox omusha njengoba phambilini bekukhona oyi-fivespeed. Enye yi-2.0 litre 4x4 LX manual.
Kuma-double cab kwethulwe entsha i-2.5 litre HO base okuyiyo eyingane emndenini ohlanganisa iHi-Rider, X-Rider oyithola nge-4x2 noma nge-4x4 kanjalo neLE.
Okuyiyona engumakhonya yi-Isuzu 3.0 LX eyi-4x2 noma i4X4. Injini yayo inamandla angu-130 kW netorque engu-380 Nm.
Yize noma kuyimoto ongayisebenzisela ibhizinisi kodwa iyimoto ewulungele nomndeni ngenxa yezinto ezengezwe kuyona futhi inesikhala esikhulu nangaphakathi okwenza uhlale ukhululeke. Inezibuko ezinkulu emaceleni, amagiya ayisithupha kanti kukhona neyi-automatic.
Inezihlalo zesikhumba kuphinde kube nendawo yokubeka ingalo ukuze ungazweli ukukhathala uma ushayela iganga elide. Iqhubeka ekhasini 4