Gwema ukushayela uma kunesichotho
ISIKHULU sakwaMasterDrive, u-Eugene Herbert, uthe isichotho sinikeza abashayeli izingqinamba emgwaqweni uma sesifikile.
Uthe iseluleko esihle angabanikeza ukuthi bangabi semgwaqweni uma sesikhona.
“Lokhu kodwa akuhlali kwenzeka, uma siqala usuvele ususemgwaqweni. Kunezinto okumele uzenze ukuzivikela nokunciphisa umonakalo emotweni yakho kulezi zimo,” kusho uHerbert.
Uthe nanka amathiphu okumele uwasebenzise uma ushayela kunesichotho;
Bheka isimo sezulu, ulalele imisakazo futhi ulalele nezexwayiso ezikhishwa yizinkampani zomshwalense ngaphambi kokushayela.
Uma sesiseduze, gwema ukushayela kuso uma ungakwazi.
Uma usuvele ususemgwaqweni, thola indawo ephephile ulinde size sidlule. Kungaba yigaraji noma indawo yokupaka engaphansi.
Isihlahla ngeke sikuvikele kahle futhi nezintambo zikagesi zingenza umonakalo omkhulu uma kuwa.
Ungalinge uphume emotweni. Uma isichotho sisikhulu singakulimaza noma ushone.
Uma ukuthelawayeka, zama ukuphuma kungaze konakale.
Kukuwena ukuthi usebenzise ama-hazard. Ama-hazard akhombisa ukuthi kukhona imoto emile. Uma uwasebenzisa uhamba, kungenza ukudideka.
Uma kodwa ungaboni kahle kumele uwashaye ama-hazard.
Ungami ngaphansi kwamabhuloho kuthelawayeka.
Gwema ukuma ezindaweni eziphansi ezingaphazanyiswa wukunyuka kwamanzi.
Hamba kancane.
Yandisa isikhala phakathi kwakho nemoto oyilandelayo usiphinde kathathu kunokujwayelekile.
Khanyisa amalambu akho, ama-daytime running lights awenele.
Uma i-windscreen yakho ilinyazwa yisichotho, ungashayeli injalo ngaphandle uma kunesidingo, kunalokho fonela usizo.
Hlola yonke imoto yakho umonakalo ongenza kube nokungozi ukushayela ngaphambi kokuqala.