‘Babalekile’ ngenxa yenkohlakalo
UBALEKE’ abasebenzi bakuMasipala waseNdumeni eDundee okuthiwa bathinteka embikweni obucayi kaNgqongqoshe uNomusa Dube-Ncube wenkohlakalo ebalelwa kuR20 million.
Kuthiwa bathathe amalivu ayisipesheli kanti abanye basabisa ngokudalula amahlazo.
Kuthinteka ngisho iphoyisa lomgwaqo okuthiwa belidla izizumbulu ebezikhokhwa kulo ngemininingwane engumgunyathi.
Lokhu kuvezwe yimithombo engaphakathi ngemuva kokuba kuyalelwe imenenja kamasipala uMnuz Sya Ntuli ukuthi ibavulele amacala emaphoyiseni.
“Ngikhuluma nawe nje abanye sekuphele amasonto amabili beselivini selokhu kuphume lo mbiko kanti abanye basezibhedlela. Inkinga lo mbiko kangqongqoshe udalula amahlazo eminyaka abenziwa okubalwa ukukhishwa kwamathenda, ukuqashwa kwabantu ngendlela engaqondakali nokukhishwa kwemali yomkhandlu udede kuthiwe kuxhaswa amasonto,” kusho umthombo.
Omunye umthombo uveze ukuthi ngendlela isimo esishube ngayo kukhona nabasebenzi asebesabisa imenenja uNtuli nabathi naye uyathinteka ekukhishweni kwamathenda ngomkhonyovu kuDundee July.
Kwenzeka lokhu nje lo masipala awusenayo ngisho imeya nosomlomo.
I-UDM ne-ANC bakhiphe izitatimende bezwakalisa ukukhathazeka ngalesi simo.
Umkhulumeli we-ANC KwaZulu-Natal, uNkk Nomagugu Simelane Zulu, uthe sebecela uNgqongqoshe uNkk Dube-Ncube angenelele njengoba umkhandlu ungasenayo imeya nosomlomo abashiye ngenyanga edlule.
UNobhala we-UDM esifundazweni, uMnuz Boysie Gumede, uthe badonswe ngendlebe abasebenzi ababanike ubufakazi benkohlalo eqhubekayo.
Uthe kukhona ehlanganisa nethenda kaR950 000 okuthiwa ababenikwe yona baphucwa kanti udaba lwabo luyangena enkantolo ngoDisemba 6.
UNtuli oyimenenja uthe ujeziselwa ukulwa nenkohlakalo kulo masipala.
“Konke engikwenzayo kubhalwe phansi ukuze nomcwaningi abe nobufakazi ngobekwenzeka. KuDundee July saba nenkinga yokuthukwa osomabhizinisi bendawo ababefuna umsebenzi ngenkani kukhona nongqongqoshe. Kwaphoqa ukuba sibaqashe bonke ukuze sigweme umsindo,” kusho uNtuli.
Uthe laba abalwayo uyabazi kodwa unombuzo wokuthi basebenza nini njengoba belibele ukukhipha izindaba nokwehla benyuka nama-quotation.
Uthe umkhandlu umyalele ukuba athathe izinyathelo avule namacala nokuyinto aphezu kwayo.
Uthe abanye bafuna kukhale isicathulo sabo ngoba benabazali abayizikhulu kwezombusazwe.
Uthe nalaba asebehambile bazobalandela ukuze baboshwe.
Okhulumela umnyango, uMnuz Lennox Mabaso uthe uNkk Dube-Ncube ulindele umbiko kwimenenja ngezinyathelo ezithathiwe kodwa uma kungenzeki lutho uzongenelela.