Umhlaziyi ubona eleNumsa lizoshubisa
UMHLAZIYI wepolitiki uMnuz Ralph Mathekga uthi iSocialist Revolutionary Workers Party izoshubisa okhethweni lwangonyaka ozayo njengoba lingekho iqembu elimele abampofu ePhalamende.
ISocialist Revolutionary Workers Party, yasungulwa yiNational Union of Metalworkers of South Africa (Numsa) emuva kokuphuma kwayo kwiCosatu.
UNobhala Jikelele weNumsa, uMnuz Irvin Jim, uthe bayajabula ukuthi inhlangano eyengamele ukhetho i-Independent Electroral Commission (IEC) ibanike imvume yokubhalisa inhlangano yabo ngokusemthethweni emuva kokukhala ngokuthi uphawu lwabo lufana nolweyelinye iqembu.
“Abantu bafuna inhlangano emele abampofu, ezobhekela izidingo zabo. Ize nezinhlelo ezizodala amathuba omsebenzi hhayi ezizohlomulisa idlanzana njengohlelo lwama-Independent Power Producers (IPPs) oluqhutshwa wuhulumeni ka-ANC. Sidinga ukukhulisa umnotho futhi iSocialist Revolutionary Workers Party izokwenza lokhu,” kusho uJim.
Uthe bazoqhubeka babe yinhlangano enomgogodla ngokukhuluma iqiniso, balwele amalungelo abampofu nabasebenzi.
UMathekga uthe iSouth African Communist Party (SACP) okuyiyona okufanele imele abampofu kodwa ayisawenzi umsebenzi wayo kwazise amalungu ayo awongqongqoshe kuhulumeni we-ANC.
“Abantu badinga iqembu elizobhekela izidingo zabampofu nabasebenzi. I-SACP ehlale izigqaja ngokumela abampofu igcina ngokukhuluma, akukho okubambekayo ekwenzayo.
Abantu abakwazi nokuthembela kwi-Economic Freedom Fighters ukuthi izobalwela ngempela ngenxa yokuthi abaholi bayo bavela kwiANC futhi abathembekile.
Akuqondakali ukuthi uMnuz Julius Malema usho lokhu akushoyo ngoba efuna amandla noma uqinisile ngokulwela amalungelo abampofu,” kusho uMathekga.