Uhlelo lukaR1m kweyekhansela eleba imfuyo
BAPHUMA bengena osopolitiki nohulumeni ewadini yekhansela elaboshelwa ukweba imfuyo KwaNongoma.
Lokhu kwenzeke ngemuva kokuthi iKhomishana ebhekele ukhetho KwaZulu-Natal imemezele ukuthi ngoLwesithathu kuzoba nokhetho lokuchibiyela ku-ward 20.
Kuzobe kuvalwa isikhala sikaZamani Henry Sibiya odonsa iminyaka eyisithupha ngokweba imfuyo eVolkrust, esifundazweni iMpumalanga.
NgoMgqibelo bekuhambele uNgqongqoshe wezoLimo KwaZulu-Natal, uMnuz Themba Mthembu ofike wadlulisela intuthuko kaR1 million.
UMthembu ufike kungakapheli namasonto amabili kutheleke uNgqongqoshe wezokuBusa nokuBambisana neziNdaba zoMdabu, uNkk Nomusa Dube-Ncube, kwaba yiMeya yaseZululand, uMfundisi Thulasizwe Buthelezi neMeya yaKwaNongoma, uMnuz Albert Mncwango.
UMthembu ubehambisana noNgqongqoshe wezeMpilo, uDkt Sibongiseni Dhlomo.
Ngisho namaqembu ezombusazwe abaholi bawo bayehla bayenyuka balalela izinkinga zomphakathi.
NgoLwesihlanu bekutheleke abeNFP beholwa wuMnuz Jeremiah Mavundla owayeyiMeya yaKwaNongoma.
NabeDA, EFF, ANC ne-IFP baphuma bengena bezocela ukuvotelwa.
Le ward ibiphethwe yiNFP kusukela ngo-2011 kodwa ngo-2016 yabuyela kwi-IFP.
“Bantu baku-ward 20 kunginika intokozo ukumemezela ukuthi uMnyango wezoLimo nokuThuthukiswa kweMiphakathi yasemaKhaya uzotshala isamba semali engu R1.1 million kulesi sigceme.
“Lolu tshalo-zimali luzoma ngale ndlela. Sizofaka amathangi amanzi angoJojo angu-10 nazo zonke izinto ezihambisana nawo ukuze asebenze. Sinembewu ezohlomulisa imindeni empofu ezoba yingxenye yohlelo lwezivande lomuzi nomuzi olunenhloso yokugqugquzela ukuba imiphakathi izikhiqizele ukudla kwayo. Sizophinde silungise amapitsi amabili eBambelentulo naKwaNgxongwane. Sizohlinzeka ngezinjini ezintathu zokumunca amanzi emadiphini aseMtikini, KwaNgxongwane naseManzamakhulu. Sizohlinzeka nangocingo olungamakhilomitha amahlanu lokubiyela amadlelo KwaNkomose,” kusho uMthembu.
Uthe ngeke kugcine lapho kodwa bazophinde bahlinzeke ngemishini yokulekelela kulinywe amahektha angu-13 ommbila.