Umfundaze wokuhlonipha uMadiba
UMKHANDLU wongqongqoshe bamazwe abangaphansi kwe-Indian Ocean Rim Association (IORA), uhloniphe umengameli wokuqala wentando yabantu wakuleli ngomfundaze ozohlomulisa intsha.
INelson Mandela Be The Legacy Internship wuhlelo lokuqeqesha intsha emikhakheni ehlukene okuzohlomula intsha eneminyaka engaphansi kuka30. Kuzohlomula intsha esemazweni angu-21 angamalungu e-IORA. Lokhu kumenyezelwe ngoLwesihlanu engqungqutheleni ye-IORA Council of Ministers eThekwini. Kule ngqungquthela bekukhona uNkk Zenani MandelaDlamini obeyisimenywa esiqavile ezokhuluma ngoyise njengoba kuwunyaka wokumkhumbula. Ubonge ukuhlonishwa kukayise ngalo mfundaze athe akangabazi ukuthi ubezowujabulela ukuba ubesaphila. Ukusungulwa kwalo mkhandlu kuthiwa kwaba wumbono kaMandela awuphakamisa emenywe e-India ngo-1995.
“Ngangikhona ngihamba nobaba e-India ngesikhathi ephakamisa lo mbono. Ngiyajabula ukuthi namhlanje kwenzeka into abezoyijabulela kakhulu ngoba ubeyiqhakambisa imfundo. Zonke izincwadi abesibhalela zona esejele ubekugcizelela ukuthi asifunde,” echaza.
UNkk Mandela-Dlamini omele elakuleli njengoHigh Commissioner eMauritius, uzibophezele ngokuthi uyafuna ukulekelela ngayo yonke indlela asize kulo mfundaze.
UNgqongqoshe wezokuXhumana kwamazwe, uNksz Lindiwe Sisulu onguSihlalo we-IORA, uthe ukusungula umfundaze yindlela yokuhlonipha uMandela ngeqhaza lakhe ekusungulweni kwalo mkhandlu. Uthe baphakamise ukuthi umfundaze wethulwe kahle ngoJulayi 18 ngonyaka ozayo e-United Arab Emirates. Ngonyaka ozayo i-United Arab Emirates ezobe yengamele i-IORA ekubeni usihlalo.
UNgqongqoshe uthe kuningi okungenziwa ozakwabo abakwi-IORA ukuthuthukisa amazwe abo.
“Ukuhlangana kwethu kumele kubuyise ithemba kwezokuvakasha. Kumele siqhamuke nezindlela ezintsha ukuze sithuthukise amazwe. Okuhle wukuthi maningi amanye amazwe asejoyinile kwi-IORA namanye asanentshisekelo yokujoyina,” kuchaza ungqongqoshe.
Uthe ongqongqoshe balo mkhandlu bazimisele ukugxila emkhakheni wezamanzi, ukulwa nokudoba okungekho emthethweni nokuthuthukiswa komnotho.
UDkt Nomvuyo Nokwe onguNobhala we-IORA uthe kumele kwande ukwenza kunokukhuluma kongqongqoshe abakulo mkhandlu.
I-IORA yasungulwa ngo-1995 e-India yethulwa ngokusemthethweni ngo-1997. Yaqala ngamazwe angu14 njengoba esengu-21. Kulo nyaka bekuyingqungquthela ka-18 kanti ngokwesibili iba kuleli.