Impikiswano ngokugqekezwa komuzi kaHHP
Kuyaphikiswana ngokuthi wubani ogqekeze wathatha izimpahla emzini wesihlabani uHHP esingcwatshwe ngoMgqibelo ngemuva kokutholakala sishonile emzini waso oseRandpark Ridge, eGoli.
Okhulumela umndeni, uNkululeko Ncana, ufake izithombe ezinkundleni zokuxhumana ethi inkosikazi kaHHP, uLerato, ifike yagqekeza yathatha izimpahla zendodana kaHHP, uLeano.
Ummeli kaLerato, uNdileka Sithole, uthe konke okushiwo wokhulumela umndeni kungamanga futhi bakuthatha njengokuqhubeka nokudicilela igama likaLerato phansi.
“Namhlanje sithole incwadi ephuma esikhonzini senkantolo esivumela ukuthi siyothola izikhiye zendlu. Kuyamangaza ngempela esikuzwayo kodwa ngingakuqinisekisa ukuthi lokhu okushiwoyo akulona iqiniso futhi kumele bakulungise,” kusho uNdileka.
UNdileka uthe maduzane bazocela isikhonzi sibaphelezele ukuze baye endlini beyothatha abakudingayo.
“Sebenza sengathi uLerato yisilwane somuntu njengoba sekuvela sengathi uxoshe ingane kaHHP endlini wakhipha izimpahla zayo. Konke lokho kungamanga. Akukaze kwenzeke lokho, sisalinde ukuhambisa izinto ngohlelo,” kusho uNdileka.
Ebuzwa ukuthi useyazi yini ngecala elivulwe wumndeni esiteshini samaphoyisa saseHoneydew, uthe ubengakatholi lutho nasemaphoyiseni ngalelo cala.
UNkululeko uthe basamile kulokhu abakushilo kodwa ube esecela ukuthi anikwe isikhathi ngoba ubesafuna ukuphumula.
“Uyazi ukuthi yima ngisithola manje isikhathi sokuphumula. Wonke umuntu uyazi ukuthi bengimatasa nezinhlelo zomngcwabo.”
Okhulumela amaphoyisa aseGoli, uLieutenant Lungelo Dlamini, uthe okwamanje basabona ezinkundleni zokuxhumana ukuthi kuvulwe icala kodwa ngakubona akukafiki lutho.