Usenkingeni owesifazane othuke inkosi
USOBISHINI owesifazane waseVuma, eShowe omangalelwe yinkosi ewumfelokazi ethi uyithuke ngokuthi ilala nomyeni wakhe.
UNksz Nokuthula Mahaye umangalelwe yinkosi ayisole ngokuba nesandla ekumhlukaniseni nowesilisa abezoshada naye. UNksz Mahaye (36) onezingane ezimbili kuMnuz Siboniso Mhlongo, ugwetshwe yinkantolo yenkosi ukuthi ayihlawule ngezinkomo ezimbili nezimbuzi ezimbili. Ubesethandane noMhlongo kusukela ngo-2006. UNksz Mahaye ungumakhelwane wenkosi eVuma lapho izalwa khona futhi basonta ndawonye ebandleni lamaNazaretha.
“Ngezwa ngezinsolo ngambuza nomyeni wami ngoba bekungasekuhle nasendlini. Ngabikela unina wenkosi ongumkhokheli wami. Okwenza kuthiwe ngayithuka inkosi yingoba ngathi uma eshona umyeni wami iyona eyomzilela ngoba ilala naye,” kusho uNksz Mahaye.
Induna, uMnuz Sipho Hlongwane, ivumile ukuthi icala lizoqhubeka liqulwe kusasa emkhandlwini. Uthe abangeni odabeni lwezinsolo zokujola ngoba noNksz Mahaye akanabufakazi.
“Icala esiliqulayo elokuthuka inkosi ngoba noNksz Mahaye walivuma. Ngamzwela eselivumile ngathi kungcono ahlawuliswe inkomo naye wavuma. Ngimangalile sekuqhamuka abomndeni wakhe bephikisana nenhlawulo ngoba wathi akanamndeni,” kusho uHlongwane.
UMnuz Mbhekiseni Mahaye, umfowabo kammangalelwa omdala, uthe bebengafuni udaba lufike emkhandlwini ngoba lubehlisa isithunzi njengoba bengamakholwa. Uvumile ukuthi uMhlongo walobola kwasala usuku lomshado. “Besingazi ukuthi abasezwani ngoba abakaze basibikele. Besilinde usuku lokumkhipha ngokusemthethweni udadewethu ayogana. Okwenza singenelele wukuthi ngesikhathi equliswa sasingekho futhi uthe waphoqwa ukuthi axolise avume nenhlawulo. Asimvikeli uma onile udadewethu kodwa sifuna ukuzizwela amacala abhekene nawo,” kusho uMahaye.
Uthe bayaphindela ecaleni kusasa ukuze banikezwe ithuba lokuphawula.
UMhlongo uthe usenezinyanga eziyisihlanu ahlukana noNksz Mahaye. Uthe uzwile ukuthi unecala lokuthuka inkosi.
“Ukuxabana kwami naye akuhlangene nendaba yenkosi kodwa uyena oyifakayo. Besisondelene nenkosi ngoba ibingibiza ngomfowabo ngenxa yokuthi sakhula ndawonye,” kusho uMhlongo.
Imizamo yokuthola inkosi ayiphumelelanga.