Bavale amasango emahhovisi kamasipala abafuna kumiswe imenenja
SEKUPHELE isonto kungasetshenzwa emahhovisi kaMasipala uMzumbe, osomabhizinisi bakule ndawo bevale amasango bethi akumiswe imenenja kamasipala abayisola ngokunikeza umyeni wayo umsebenzi.
Osomabhizinisi baqale ngoLwesibili olwedlule ukuvala amasango bethi imenenja kamasipala, uNkk Nokuthula Mgijima, ayimiswe esikhundleni bese umasipala uphenya ngokunikezwa kwenkampani yomyeni wayo, iMbumba, umsebenzi wokuba yi-consultant ezinhlelweni ezinkulu kumasipala.
UMnuz Senzo Ngcobo, uSihlalo woMzumbe Business Chamber uthe: “Ngokuthola kwethu kunezinkampani ezisondelene nemenenja okuthi uma zithole umsebenzi kumasipala zithole imali eyengeziwe ngenxa yokuthi zisebenzisa umthetho i-validation order zithi kunezinto ezengeziwe kulowo msebenzi ebeziqashelwe wona ebezingekho ukhangiswa. Ohlelweni lokwakhiwa kwesikhungo iNtelezi Msani kwenziwa into efanayo mina ngayithola ithenda. Inkampani yomyeni wemenenja eyayiyi-consultant yathi angime ukusebenza ngoba umsebenzi ngawuthola kuwuDisemba lina ngize ngiqale ukusebenza phakathi noJanuwari. Ngakwenza lokho kodwa ngathola incwadi iphuma kuyo futhi inkampani ithi inkontileka yami izonqanyulwa ngoba angisebenzi ngendlela, okwalandela kwaba wukunqanyulwa kwenkontileka yami.” Bathi inkampani eyanikezwa umsebenzi wokwakha amahhovisi amasha kamasipala isikhokhelwe imali engaphezulu kukaR20 million kodwa akukakabikhona ngisho izindonga.
Imeya yomkhandlu, uMnuz Sizwe Ngcobo, ithe konke okuphakanyiswa osomabhizinisi kuyaphenywa kodwa ayikwazi ukumisa imenenja ingayilandelanga imigudu efanele.
UMnuz Lennox Mabaso uthe uNgqongqoshe wezokuBusa ngokuBambisana, uNkk Nomusa Dube-Ncube uthumele ithimba eliyoxazulula izinkinga kumasipala.
“Umkhandlu ulawulwa yimithetho, uma kunezinsolo zokuthi akulandelwanga imithetho yokukhishwa kwamathenda zikhona izindlela zokukhala, okhalayo angaze afinyelele enkantolo. Ukuphazamisa ukusebenza kumasipala kungukwephula umthetho,” kusho uMabaso.