Uvalo kugasela izigebengu emahhovisi
BASATHUTHUMELA abasebenzi boMnyango wokuBusa ngokuBambisana ehhovisi eliseMayville ngemuva kokuthi izigebengu ebezihlomile zigqekeze ihhovisi, zaduna imoto yomsebenzi zalayisha kuyo amakhompyutha eziwebe kuleli hhovisi izolo.
Abasebenzi abakholwa wukuthi izigebengu bezizilungiselele zizongena ehhovisi, abakhulume naleli phephandaba bacela ukungadalulwa, bathe basathukile futhi banovalo lokuthi kungenzeka izigebengu ziphinde zibuye zizogqekeza amanye amahhovisi.
Leli phephandaba lifike abasebenzi bemi izixongololo emaphaseji bebuka umonakalo odaleke kungena izigebengu.
Ngokuthola kweSolezwe ngomthombo walo osebenza emahhovisi, amadoda amahlanu abehlome ngezibhamu afike ehamba ngemoto ngemuva kwehora lesihlanu ekuseni enza sengathi angabantu abalethe okuthile. Unogada obeyedwa ngaleso sikhathi usondele emotweni yawo ethi uzobuza ukuthi aletheni.
“Kuvuleke izicabha kwaphuma amadoda amahlanu amkhomba ngezibhamu, avulela ngesibhaxu kuye maqede amthatha ayomvalela egumbini lonogada. Ngokukhulu ukushesha amanye abegijima ayogqekeza umnyango omkhulu ongenela ngaphakathi emahhovisi, agqekeza ihhovisi eliseduze athatha amakhompyutha, ama-laptop namaTV abephanyekwe odongeni. Ngesikhathi esephuma azithele komunye umsebenzi wesifazane obefika emsebenzini amkhomba ngesibhamu, aduna imoto yakhe afaka kuyo ezinye izinto ezebiwe kuleli hhovisi ashaya achitha,” kusho umthombo.
Kuthiwa sekungokwesibili kugqekezwa. Ngo-Agasti amasela asika ucingo angena ngaphakathi agqekeza ihhovisi elingumahamba nendlwana athatha ama-laptop.
UNgqongqoshe womnyango, uNkk Nomusa Dube-Ncube, usigxekile lesi sigameko, wathi bekungenzeka siphethe ngokuthi kube nomsebenzi ofayo.
Uqhube wathi okwenzekile kuwubulwane wathi abenzi bobubi kudingeka ukuthi basuswe emphakathini ngoba bayingozi.
Imoto yomsebenzi edunwe esangweni lasemsebenzini uthe itholakale emgwaqweni eNewlands.
Ubuye wanxusa amalungu omphakathi okungenzeka abe nolwazi lokuthi ngobani ababandakanyeka kulesi sigameko wathi mawalekelele amaphoyisa ngolwazi olungaholela ekuboshweni kwabo.
UCol Thembeka Mbele, okhulumela amaphoyisa kulesi sifundazwe, uthe owesifazane oneminyaka ewu-52 osebenza kuleli hhovisi ukhonjwe ngesibhamu wadunwa imoto yakhe ngamadoda okusolwa ukuthi avalele unogada egumbini aphinde agqekeza amahhovisi.
“Izigilamkhuba ezigqekeze ehhovisi zibaleke ngemoto etholakale eNewlands. Kuvulwe icala lokugqekeza eliphenywa ngamaphoyisa aseMayville,” kusho uCol Mbele.