Ugixabezwe odilika abahlanu umdlwenguli
UVELE wamoyizela umdlwenguli ngesikhathi ijaji eNkantolo eNkulu yaseThekwini limgixabeza ngodilikajele abahlanu neminyaka engu-68 ebhadla ejele ngamacala ahlukene okuthumba abesifazane bese eyabadlwengula.
Izolo uMthobisi “Mthoba” Mnyandu (31) waseTafuleni eNanda ubemoyizela sengathi akwenzekanga lutho ngesikhathi ijaji uMokgere Masipa limgweba. Ngisho noma amaphoyisa esemthatha emfaka ezitokisini zasenkantolo ubelokhu emoyizela.
UMnyandu wadlwengula abesifazane abayisikhombisa abaneminyaka ephakathi kuka14 no-16 phakathi kuka-2010 no-2016 ezindaweni ezehlukene eThekwini.
Wayenza sengathi uyabashela kanti uzobathatha ngenkani abafake ezindlini zokushintshela ezinkundleni zemidlalo bese eyabadlwengula.
Ijaji lithe ubenesihluku esimangalisayo edlwengula abesifazane abasebancane.
“Wena ubacekele phansi bonke laba besifazane wabaphuca isithunzi nokuziqhenya ngokuba abantu besifazane. Abane babengamatshitshi bebheke ukuba bazigcine baze bathole abantu abangathandana nabo kodwa wena wafika njengesela wantshontsha lelo gugu. Inkantolo ibona ukuthi wababulala bephila ngesihluku owasenza kubona. Ufanele ukususwa emphakathini isikhathi eside ngoba ngeke sisahlunyeleliswa isimilo sakho,” kusho iJaji uMasipa.
Libe selimnikeza odilikajele ngamacala amahlanu okudlwengula, iminyaka engu-15 icala ngalinye emacaleni amabili okudlwengula, iminyaka engu-23 ngamacala ayisishiyagalombili okuthumba abesifazane. Unikwe iminyaka engu15 ngecala lokubamba inkunzi. Lezi zigwebo zizohambisana.
“Wawuthatha la mantombazanyana amancane ngomzimba owazi kahle ukuthi ngeke azilwele. Omunye wesifazane kuthe usuqede ukumdlwengula wamnikeza ikhadibhothi leKFC lingenalutho ukuba azisule ngalo, lokhu kwamehlisa isithunzi sakhe wazizwa engelutho. Wamzwisa ubuhlungu,” kusho iJaji uMasipa.
IJaji likhale ngomphakathi njengoba abanye abadlwengulwa bacela usizo emphakathini bezikhalela kodwa umdlwenguli wathi yizintombi zakhe ngakho ababayeke. Lithe lokhu kwenza bayekela umdlwenguli wahamba nabesifazane agcina ngokubadlwengula.
Ijaji lithe bekucaca nakubufakazi obethulwe wumdlwenguli ukuthi ubengeke esashintsha ezenzweni zakhe.
“Ubungaze uzitshele ukuthi emuva kokumosha impilo yabesifazane ungazisola kodwa kunalokho utshele le nkantolo ukuthi ukube awuzange uboshwe ngo-2016 ubusazoqhubeka udlwengule abanye besifazane ngoba wena ubungaliboni iphutha kulokhu obukwenza kodwa ubulandela imizwa yakho,” kusho iJaji uMasipa.
Enkantolo kufundwe izincwadi zabagilwa ezifungelwe lapho beveze khona ukuhlukumezeka kwabo. Abanye baveze ukuthi abafune muntu wesilisa eduze kwabo ngoba abasethembi muntu, abanye bathi abacabangi ngisho nokuya ocansini noma ukuba nezingane.
Omunye uthe usephenduke inkomo edla yodwa nasenkonzweni ngoba abanye abazali bezingane bathi azingasondeli kuyena ngenxa yesigameko esamehlela. Bonke bakhale ngokuthi impilo yabo ngeke iphinde ifane nakuqala.