Unqabe ibheyili osolwa ngokuqotha umndeni
UNQABE ukufaka isicelo sebheyili umlisa (27) osolwa ngokuba ngungqondongqondo ecaleni lokubulawa kwamalungu omndeni eVlakfontein, eGauteng.
Lo mlisa obaziwa njengoMnuz Sibusiso Khoza okuvele ukuthi unguMnuz Ernest Mabaso nasolwa naye uMnuz Fifita Khupe (61) uvele eNkantolo yeMantshi yaseLenasia izolo ngamacala okubulala umndeni wakwaKhoza, oNksz Mbali Khoza (51), Dudu Khoza (46) indodakazi yakhe uNksz Nomfundo Khoza (28) nabazukulu uKarabo (11), uLuyanda (7) , uNkanyiso (2) noSibongakonke (2). Laba bafihlwe eMgungundlovu ngeSonto.
Izidumbu zalaba zitholakale ngesonto eledlule ezinye zigqitshwe endlini emuva kokuthi begcine ukubonakala ngo-Okthoba 19 nonyaka. Yize ingakacaci imininingwane yokubulawa kwalaba kukholakala ukuthi izingane zagxokogxwa emehlweni ngento ecijile nokuthi kungenzeka ukuthi zadlwengulwa.
UMabaso utshele inkantolo ukuthi ngeke asifake isicelo sebheyili uma loyo asolwa naye esefaka isicelo sebheyili ngoMsombuluko ozayo. Laba bobabili babhekene namacala ayisikhombisa okubulala. Phezu kwaloku uMabaso uphinde abhekane namanye amacala amathathu okudlwengula nelokweba. Ngesikhathi wethula ubufakazi bawo, uMbuso uveze izinsolo zokuthi babulala behlelile.
UMabaso – obegqoke i-jean eluhlaza okusasibhakabhaka nejakhethi ensundu nesikibha esinombala obomvu nokumhlophe ngaphansi, engakamile ekhanda – ubebukeka edidekile ngesikhathi esenkantolo kuvele ukuthi ungowaseZimbabwe. Kuthiwa wazisondeza emndenini wakwaKhoza ezenza isihlobo sabo wase ehlala nabo isikhathi esingangezinyanga ezintathu ngaphambi kokuthi babulawe ngesihluku. NgeSonto amaphoyisa aveze ukuthi ambophe eduze komngcele waseLebombo ezama ukuphuma kuleli. Utholakale ephethe amakhadi asebhange ababulewe. UKhupe okuvele ukuthi ungowaseMozambique yena uboshwe eDobsonville.
Ummeli wamahhala obemele laba bobabili, ogcine aziwe ngoMnuz Hadebe, uveze ukuthi ngeke asakwazi ukuqhubeka nokumela uMabaso. Uthe uzokhuluma nomunye wozakwabo ukuze aqhubeke nokummela uma kuqhubeka icala.
Beziqinisiwe ezokuphepha ngesikhathi laba bobabili bevela enkantolo. Ngaphandle abantu bebebhikisha bethi bayaphikisana nokuthi banikwe ibheyili.
Ekhuluma ngaphandle kwenkantolo, okhulumela iNational Prossecuting Authority, uNkk Phindi Mjonodwana, uthe abazi ukuthi yini eholele ekutheni uMabaso athi ngeke asifake isicelo sebheyili njengoba ethe kungenzeka ukuthi usabela impilo yakhe. Uthe bazosiphikisa isicelo sikaKhuphe sebheyili.
Uthe uphenyo lwabo lusaqhubeka kodwa okuningi ngokwenzeka kuzovela ngokuqhubeka kwecala.