I-DA ifuna kuxoshwe ongqongqoshe
UMHOLI weDA, uMnuz Mmusi Maimane, uthe basaqhubeka nomkhankaso wabo wokuthi kuxoshwe uNgqongqoshe woMnyango wezaseKhaya uMnuz Malusi Gigaba nowoMnyango wabesiFazane uNksz Bathabile Dlamini ngoba abathembekile.
UMaimane uthe emuva kokubhalela uMengameli Cyril Ramaphosa bemcela ukuthi axoshe labo ngqongqoshe kodwa wangabaxosha banqume ukuya enkantolo ukuze kube wumthetho onquma ngekusasa labo.
“Siyakuqinisekisa ukuthi udaba lwethu luzolalelwa enkantolo iNorth Gauteng ngoMashi 11 wonyaka ozayo futhi sifuna umengameli nongqongqoshe esifuna baxoshwe bakhokhe izindleko zenkantolo. Asikwazi ukuba nongqongqoshe abaqamba amanga bebe befunge ukuthi bazokhuluma iqiniso. Ngeke sivume ukuthi kusetshenziswe imali yabakhokhi bentela kuleli cala,” kusho uMaimane.
Uthe bafuna kuxoshwe uGigaba ngoba unike inkampani yakwa-Oppenheimer iFireblade Aviation imvume yokusebenza e-OR Tambo International Airport.
Uthe uNksz Dlamini kufanele ahambe ngoba akabakhathalele abantu njengoba anyusa amaphaphu abantu abahola izibonelelo zikahulumeni.
“Uyena owayedala inkinga yezibonelelo zikahulumeni futhi uyena owafaka uhulumeni ezindlekweni ngoba engafuni ukunqamula inkontileka yeCash Paymaster Services neSouth African Social Security Agency. Asazi umengameli usamgcineleni kwiKhabhinethi ngoba akathembekile,” kusho uMaimane.
Uthe namhlanje bazoya enkantolo ukuyolwa udaba lokuthi owayengumengameli wezwe, uMnuz Jacob Zuma azikhokhele izindleko zasenkantolo.
“Silindele ukuthi izindleko zecala likaZuma zibe wuR50 million akufanele abakhokhi bentela bazithwale kufanele azikhokhele yena,” kusho uMaimane.
Umhlaziyi wepolitiki uMnuz Ralph Mathekga uthe kuzoyakha iDA ukulungisa okonakele kuyo njengoba ishiywe ngamakhansela ayisishiyagalombili kuMasipala waseCape Town.
“Yebo kuhle ukuthi iDA ifuna abaholi baziphathe kahle kodwa kuzoyisiza ukubheka izindaba zayo kuqala ngaphambi kokujaha ezabanye. Konakele eWestern Cape angiboni ukuthi iDA izothola ngaphezu kuka 50% kodwa uMaimane ujaha ukuphawula ngongqongqoshe okufanele baxoshwe,” kusho uMathekga.