Sibalulekile isiphakamiso sikaRamaphosa
IMFUNDO yilungelo elilotshwe kuMthethosisekelo wezwe, okusho ukuthi zonke izingane zinelungelo lokuya esikoleni. Ukubaluleka kwemfundo kwagcizelelwa nowayengumengameli uMnuz Nelson Mandela owathi imfundo yisikhali sokukhipha umuntu ebubheni.
Ukwenziwa kwemfundo ibe mahhala eNingizimu Afrika kwakuhamba khona emgomeni woMthethosisekelo wokuthi kungabi khona sizathu esizophoqa ingane ukuba ingayi esikoleni.
Kuyakhathaza nokho ukuthi kukhona izingane ezingayi esikoleni yize imfundo imahhala futhi nabazali bazo kabenzi lutho ngalokho.
Ezinye zalezi zingane zigcina sezingene ebugebengwini ziboshwe, kumosheke ikusasa lazo.
Yingakho sibalulekile isiphakamiso sikaMengameli Cyril Ramaphosa othi ucabanga ukuphakamisa umthetho wokuthi kuboshwe abazali abanqabela izingane zabo ukuthi ziye esikoleni kanjalo nalabo abayekelela izingane uma zingayi esikoleni.
Siyaseseka lesi siphakamiso, siyafisa ukubona umthetho ojezisa abazali ababudedengu nabangalikhathaleli ikusasa lezingane zabo.
Uhulumeni wentando yabantu wenza umsebenzi omkhulu wokuthi imfundo ibe mahhala eNingizimu Afrika nokwenza ingcabha ibe kubazali ngokufunda kwengane.
Akekho umzali ozokhala ngokuthi akanayo imali yokufundisa ingane ngoba zikhona izikole okufundwa kuzona mahhala.
Lukhona nohlelo lokudla ezikoleni kulabo bafundi abaswele.
Asikho ngempela isizathu esingenza ukuthi umzali ahlale nengane ekhaya njengoba kunalezi zinhlelo zikahulumeni.
Siyazibuza ukuthi umzali osuke ebona noma ezwa ukuthi ingane yakhe kayiyi esikoleni uthula kanjani nalesi simo?
Abazali kumele bazibandakanye ekukhuliseni nasekufundeni kwezingane zabo, akungabi khona mzali ozohlala nengane engayi esikoleni.
Kungenjalo awuphasiswe impela umthetho wokubahlawulisa.