Sicela umphathi wamajele azobona umgunyathi
MHLELI:Kwelakho iphepha eliwela umfula ugcwele ngithi akengibeke isikhalo seziboshwa.
Ngingajabula uma umphathi wezamajele KwaZulu-Natal athumele ithimba labaphenyi ukuthi livakashele ijele laseMgungundlovu.
Buningi kakhulu ubugebengu kuleliya jele kakhulukazi uma kuziwa ngasekuphakeleni iziboshwa. Kuke kwadliwa amaqanda abhoyiliwe inyanga yonke.
Uthola ukuthi ngolunye usuku kuke kwadliwa ngabo 5 ntambama, okusho khona ukuthi ukudla kwakungekho kwase kuhlanganiswa ngoba sekwenzelwa ukuthi kuneziboshwa ezidla amaphilisi.
Okunye okuxakayo ukuthi akekho oke afike achaze ukuthi kunenkinga, kuvele kuthulwe nje kube sengathi alikho iphutha kokusuke kwenzeka. Angiphathi-ke okwezinkwa ezidliwa khona kungathi kuthengwa izinkwa ezisuke sezihlale izinsuku ezintathu noma ezine ngoba uyazizwa nje ukuthi sezihlalile. Nanokuthi uludla kanjani uphuthu neklabishi zonke insuku. Abezempilo bathi akudliwe izinto ezihlukene.
Nami angisho ukuthi akudliwe inyama zonke izinsuku kodwa lokhu okwenziwa lapha uyabona nje ukuthi kusuke sekwenzelwa ukuthi kube khona okusethunjini.
Ngiyazi ukuthi uma kungase kuthunyelwe abacwaningimabhuku mningi umgunyathi ozovela.
Ngingabonga kakhulu uma kungase kube khona okwenzekayo ngoba impela uma kungenzeki uphenyo oluphuthumayo baningi abantu abazodlula emhlabeni. Malusi Zondo