Izinkinga zibikwa nakwezizimele
AMAPHUTHA aholela ekutheni iziguli zigcine zishonile noma zikhubazekile awenzeki ezikhungweni zikahulumeni kuphela kodwa nasezikhungweni ezizimele amazinga amaphutha aphezulu.
Ucwaningo lwakamuva olwenziwe yisikhungo semfundo ephakeme iStellenbosch University luveza ukuthi sinyuka ngokushesha isibalo samaphutha enzeka ezikhungweni zezempilo ezizimele.
USolwazi Ethelwynn Stellenberg, wophiko olucija abahlengikazi nabafundela ukubelethisa eStellenbosch University, wenze ucwaningo ebheka amaphutha enziwe abahlengikazi ezikhungweni zezempilo ezizimele.
Yize noma ucwaningo lwabo lubheke izikhungo ezizimele eziseGauteng naseWestern Cape kodwa luveza isithombe esishaqisayo ngezikhungo zezempilo ezizimele kuleli.
Babheke izigameko ezingu-122 zamaphutha bathola ukuthi iningi lazo liholele ekutheni kufe iziguli. U-74% walezi zigameko usonjululwe ngokuthi kuxoxwe ngaphandle kwasenkantolo. Bathole ukuthi ukungenzi kwabahlengikazi ngendlela kuholele ekutheni iziguli zibe nezinkinga zezempilo, ezinye zazo zigcine zidinga ukuhlinzwa kaningi. Ezinye zalezi ziguli (25%) bezigcina sezikhubazekile.
Noma kuvele ukuthi siphezulu isibalo samaphutha enziwa abahlengikazi, uSolwazi Stellenberg uthe lesi sibalo siphezulu nakodokotela.
“Kulezi zigameko ezingu-122, u-43% wazo ubuhlanganisa odokotela nabahlengikazi. Yikhona nje ukuthi thina besibheka okwenziwa abahlengikazi kusuka isiguli singeniswa esibhedlela kuze kube isiguli siyadedelwa. Besibheka ukuthi yikuphi abakwenzayo nokuthi yikuphi abangakwenzi,” kusho Stellenberg.
Uthe okubamangazile wukuthi izinkinga eziningi bezidalwa ukunganakekelwa ngendlela kweziguli nokungalalelwa kwazo ngendlela efanele.
Kuvela le miphumela nje kusanda kuvela ukuthi uMnyango wezeMpilo ubhekene namacala ezempilo adinga uR17.5 billion ngenxa yamaphutha enzeka ezikhungweni zezempilo.
Phambilini uNgqongqoshe wezeMpilo kuzwelonke, uDkt Aaron Motsoaledi, uzwakalise ukukhathazeka ngokuyiswa koMnyango wezeMpilo enkantolo ngenxa yamaphutha enzeka ezikhungweni zezempilo.
Uze waba nengqungquthela lapho ehlangane khona nabameli nabanye abathintekayo uma kufakwa amacala ngenhloso yokuqhamuka namacebo okulungisa lesi simo. Lokhu kwenze abaningi babona sengathi le nkinga ibhekene nezikhungo zezempilo zikahulumeni kuphela kodwa uphenyo lukaStellenberg nolunye lwaphambilini luyakukhombisa ukuthi yinkinga exake nezikhungo zezempilo ezizimele.
Ezinye zezizathu okukholakala ukuthi ziholela ekutheni izikhungo zahulumeni zibhekane nale nkinga wukushoda kwabasebenzi nokungenami kwabo ngomsebenzi abawenzayo ngenxa yokugqilazeka kwabo ezikhungweni abasebenza kuzo nokunye.
USolwazi Stellenberg uthe izinga lokunakekelwa kweziguli ngendlela efanele ezikhungweni zezempilo liyehla ngisho kungathiwa yizikhungo zezempilo ezizimele noma ezikahulumeni.
“Akuzona izikhungo zezempilo zikahulumeni kuphela ezingaphansi kwengcindezi kodwa nezikhungo zezempilo ezizimele zinenkinga. Siyazikhohlisa uma sicabanga ukuthi izikhungo ezizimele zingcono kunezikhungo zikahulumeni.
“Asikwazi ukuqhubeka nokuziba le nkinga. Kumele sithole indlela yokufaka ingcindezi ukuze siqinisekise ukuthi iziguli zithola usizo eziludingayo. Akufanele kwenziwe imali kube kubekwa impilo yeziguli engcupheni,” kusho uSolwazi Stellenberg
Uthe akuwona amacala afakwa yiziguli ezikhungweni ezizimele kuphela akhathazayo kodwa yisibalo sawo njengoba amanye awo aseze afinyelela esigidini.
Uthe okubi wukuthi la macala agcina ethwalwe amakhasimende – okungezinye iziguli ezisebenzisa lezi zikhungo ezigcina zikhokhe imali enkulu ukuze zithole usizo lwezempilo.
USolwazi Stellenberg uthe abakutholile wukuthi izikhungo zezempilo azisebenzisi abahlengikazi kuphela kodwa zisebenzisa nonompilo okuwukuthi abakuqeqeshelwe ukunakekela iziguli ngendlela ezisuke zidinga ukunakekelwa ngayo.
Kuvele ukuthi abahlengikazi bagcina benziswa imisebenzi yasemahhovisi njengokugcwalisa imininingwane esuke idingwa yisibhedlela kunokuthi banakekele iziguli.
“Iningi labahlengikazi abanakekela iziguli ezisesimeni esibucayi abahlengikazi abaqeqeshelwe ukwenza imisebenzi engaphansi kwaleyo abayenzayo. Okuyibona okufanele ngabe benza lo msebenzi bahleli emahhovisi benza imisebenzi yokugcwalisa imininingwane ethile nokunye,” kusho uSolwazi Stellenberg.
Uthe abanye abahlengikazi babhala izinto okungezona phansi nokwenza kube nzima ukuthi iziguli zilashwe ngendlela. Abanye bachaza okungekhona uma bechazela odokotela ngezinkinga ezibhekene neziguli.
Abanye bebehluleka wukunika iziguli imishanguzo okufanele ngabe zinikwa yona. Uma iziguli zihlinzelwe izinkinga ezithinta iqolo bebengazibheki ukuthi zilulama ngendlela yini.
Okunye akubalulile wukuthi izikhungo zezempilo ezizimele abazame ukuthola imininingwane kuzo azifunanga ukuphumela obala kuze kwasiza abameli abasuke beyingxenye yala macala nokuyibona abakwaze ukusiza nababone kubalulekile ukuthi kwenziwe lolu cwaningo.