Kugqugquzelwa abesilisa ukuthi banakekele impilo yabo
KUBALULEKILE ukuthi abantu besilisa bakusukumele ukunakekela isimo sabo sezempilo nokuthi basheshe bahlolele izifo kusenesikhathi.
Ngokwezibalo zakuleli kukholakala ukuthi abantu besifazane baphila isikhathi eside kunabantu besilisa.
UMnuz Graham Anderson, oyisikhulu sakwaProfmed, uthe sekukhona umehluko endleleni abantu besilisa abanakekela ngayo impilo yabo uma kuqhathaniswa nezikhathi zakudala kodwa lokhu akusho ukuthi akufanele benze okungaphezu kwalokhu.
Uthe abantu sebenza kangcono ekunakekeleni impilo yabo ngokuthi bajoyine amajimu bazibandakanye emidlalweni eyahlukene ebenza bagcine imizimba yabo isesimeni esifanele nokunye. U-Anderson uthe ngesikhathi eqala ukungenela iComrades Marathon babengaphansi kuka-5 000 abantu ababeyingxenye yalo mjaho kodwa manje sebengaphezu kuka-20 000.
Uthe sekubaluleke kakhulu kunakuqala ukuthi abantu besilisa bayinakekele impilo yabo ukuze kuthi noma kukhona izifo ezibangenayo zisheshe zibambeke – bakwazi ukusheshe bathole imishanguzo.
Ngokujwayelekile abantu besifazane bayaye bakhuthazwe besebancane ukuthi bahlole amabele abo babheke ukuthi kukhona yini okungekho esimeni esifanele nokuthi baye kohlola ezikhungweni zezempilo uma besola ukuthi kukhona okungekho esimeni. Nabantu besilisa nabo kubalulekile ukuthi benze okufanayo – bazihlole bese bephinda beya ezikhungweni zezempilo uma kukhona okusolisayo.
U-Anderson uthe abantu besilisa abaningi abakhululekile ukudingida izimpawu zezifo.
“Abantu besilisa abaningi abavamile ukuzizwa bekhululekile ukuthi bangaxoxa kabanzi ngezimpawu zezifo, ikakhulu uma kuyizimpawu ezibucayi nabazibona zibakhathaza. Kufanele bayinakekele impilo yabo bazivocavoce ngokwenele, behlise ophuzweni oludakayo, baphuze kakhulu amanzi bese beyeka ukubhema,” kusho u-Anderson.
Ubalule izifo okumele abesilisa bazibheke ngoba ziyingozi. Isifo sikashukela: Isifo sikashukela singezinye zezifo ezihamba phambili ekubulaleni abantu kuleli. Emuva kwesifo sofuba singesesibili ezifeni ezibulala abantu kuleli. Isikhathi esiningi abantu besilisa abazazi izimpawu futhi baze baye kozama ukuthola usizo uma sebenezinkinga ezisobala njengezinkinga zezinso nezinkinga zamehlo.
Kubalulekile ukuthi abantu besilisa bahlole amazinga abo ashukela bese bebheka uma kukhona ushintsho endleleni abomela ngayo amanzi, abadla ngayo, abachama ngayo nangendlela ababona ngayo. Isifo senhliziyo: Isifo senhliziyo naso yisifo esivame ukuthi sibeke abantu besilisa engcupheni yokugula ikakhulu uma sebedlule eminyakeni engu-45 noma bekhuluphele kakhulu. Kubalulekile ukuthi baqaphe izimpawu okubalwa kuzo ubuhlungu besifuba, inzululwane, ukucikizela kwenhliziyo, ukungagayeki ngendlela kokudla, isilungulela nobuhlungu esiswini nokunye. Umdlavuza: Kubalulekile nokuthi abantu besilisa bakuqaphele ukuhlolela izifo okubalwa kuzo umdlavuza wamankwahla, owomphimbo nowamaphaphu.
Kufanele abantu besilisa bazihlolele zonke lezi zifo ngoba nabo basethubeni elikhulu lokuthi babenazo. Ukhwantalala: Okunye okufanele abantu besilisa bakubheke ukuqinisekisa ukuthi isimo sabo somqondo sisesimeni esifanele njengoba abanye babo besengcupheni yokungenwa wukhwantalala.
U-Anderson uthe abanye abantu besilisa abakukhonzile ukuphumela obala ngemizwa yabo nangezinto ezibakhathazayo, lokhu kuholela ekutheni abanye bazithole behlaselwa ukhwantalala – abanye bagcine bezibulele.
Kukholakala ukuthi bangu-14 abantu besilisa abazibulalayo usuku nosuku.