‘Ayikho eyokuthi iqembu kalinamali’
USIMO Dladla, opheka iReal Kings FC edlala kwiNational First Division (NFD), uchitha amahlebezi okuthi iqembu lakhe alinayo imali yokuholela badlali.
UDladla ubize lokhu ngamampume ashiwo ngabathile abahlose ukudicilela isithunzi seqembu phansi.
Ngokwemibiko kuvela ukuthi iKings ayisenayo imali kangangokuba sekukhethwa iphela emasini uma kuholelwa abadlali. Kukhona osekuphele izinyanga bengaholi.
Ngesizini edlule iKings ibivutha ingabaselwe kwasala kancane ingene kweyokuhlungela ukungena kwi-Absa Premiership. EzikaDladla zilale endaweni yesine kwilog ngesizini edlule.
Nokho selokhu kuqale isizini, iKings akuyihambeli kahle, isanqobe imidlalo emibili, kweyishumi. Lokho kuyishovele kunombolo 13 kwi-log ngamaphuzu ayisishiyagalolunye.
Engxoxweni naye izolo, uDladla ukukhahlele ngazo zombili ukuthi ezakhe zidonsa kanzima kwezemali.
“Yinto engekho leyo. Kukhona abangithintile ngeledlule, bebuza ngala mahemuhemu nabo ngabatshela ukuthi ayikho leyo nto, konke kuhamba kahle eqenjini. Thina eqenjini sihola sonke ngomhlaka 2. Lokho kusho ukuthi ngoLwesihlanu olwedlule besihola, futhi ngazi ukuthi wonke umuntu uholile. Eqenjini ngenza imisebenzi emibili – ngingumqeqeshi ngiphinde ngibe yimenenja. Ngakho okuningi kudlula ezandleni zami, ngikwazi kahle njengoba ngizazi,” kusho uDladla.
Eqhubeka echaza, uthe usola ukuthi kunabathile abazama ukudicilela isithunzi seqembu phansi ukufeza izinhloso zabo.
“Kunabantu abathile abazama ukudicilela phansi isithunzi seqembu. Kunenqwaba yabantu efuna ukungena lapha kwiKings kodwa akulula. Manje bazama ngazo zonke izindlela ukudunga into enhle esiyenzayo. Kuyishwa nje ukuthi ngeke ngikwazi ukukutshela zonke izinto abazenzayo kithina kodwa iqiniso nje ngamanga aluhlaza lawo abawashoyo,” kuqhuba uDladla.
Enezezela uDladla uthe: “Le nto yimbi ngoba yehlisa nesithunzi sikasihlalo uNgidi kanti okushiwoyo akulona iqiniso. Thina siholela wonke umuntu lapha eqenjini lethu, siholela ngisho umuntu onqanyulelwe inkontileka yakhe”.
L