UMbesuma ufuna ukusiza iqembu lakhe
UMGADLI weMaccabi FC, uCollins “Ntofontofo” Mbesuma, uthi usazizwa ewumqemane futhi uzimisele ngokusiza leli qembu leNational First Division (NFD) likhuphukele kwi-Absa Premiership.
UMbesuma owazakhela igama esagijima kwiKaizer Chiefs, ujoyine iMaccabi ngesizini edlule isayibambe kwi-ABC Motsepe League eGauteng.
Uyisizile ikhuphukela kwiNFD ekupheleni kwesizini edlule.
Njengamanje iqembu lakhe liyibambe endaweni yeshumi ngamaphuzu awu-12 kwi-log.
Ngempelasonto lihlule iRoyal Eagles ngo 2-1 eChatsworth Stadium.
Ekhuluma ne-Independent Media ngemuva komdlalo, uthe: “Ibhola ngilizwa ngaphakathi futhi liyimpilo yami. Angikaqedi ngalo. Ngisazizwa ngiwumqemane ukuthi ngingaqhubeka ngilidlale.”
Lo mgadli odabuka eZambia uthe wethemba ukuthi isipiliyoni esiseqenjini sizolisiza ekutheni likhuphukele phezulu.
Akusiyena yedwa umdlali osemnkantshubomvu kwiMaccabi njengoba ibophele noLebogang “Cheeseboy” Mokoena noThapelo Tshilo ongukaputeni. Baqeqeshwa uTsotetsi Mokete onguntanga yabo owayeyibamba kuMakhosi.
“Ngifuna ukusiza iqembu ngesipiliyoni enginaso. Kwesinye isikhathi uyakwazi ukukhombisa abantu ukuthi benze iphutha (ngokuthi kuthiwe usemdala). Angizelanga imali lapha kodwa ngize ngoba ngisafuna ukuqhubeka nomsebenzi wami. Ngesikhathi ngifika ngabatshela ukuthi ngifuna ukusiza iqembu likhuphukele kwiNFD namanje ngifuna ukulibona likhuphukela kwiPSL (Premiership), yilokho engikulwelayo.
“Bengingafuni ukuya lapho engizohlala khona (ebhentshini) ngihole kuphela. Ngifuna ukudlala futhi ngisengadlala noma yikuphi,” kusho uNtofontofo.
NgoMgqibelo bazovakashelwa Uthongathi FC eDobsonville Stadium ngo-3.30 ntambama. UMbesuma uthe umbango wokukhuphukela kwi-Absa Premiership usavulekile.
“Nakanjani, yini singeke sikwazi?” kusho yena ephendula umbuzo wokuthi ubona bengakwazi yini ukusidla isicoco.
“Uma sizethemba nje. Sinabadlali abasebancane esisuke nabo kwi-ABC esibasizayo njengoba besafunda. Uma sesihlangene sayiqembu kungenzeka. Siyiqembu elihle futhi elinabaphathi abayaziyo into abayenzayo. Sizolokhu siqhubeka nokusebenza kanzima umdlalo ngamunye,” kusho uMbesuma.