ULarsen uzishaya isifuba ngegoli lomgadli wakhe
UMQEQESHI weLamontville Golden Arrows, uClinton Larsen, akangabazi nakancane ukuthi igoli lomgadli wezakhe uKnox Mutizwa lizobalwa namanye azobanga umklomelo wegoli elihambe phambili kule sizini ka-2018/2019.
Izolo iPremier Soccer League (PSL), ichome uphaphe lwegwalagwala uMutizwa ngokushya igoli elivelele enyangeni u-Agasti. Lelo goli walishaya i-Arrows idlala nabakhaya iMaritzburg United ngo-Agasti 5 emdlalweni weligi. Abafana Bes’thende bawunqoba ngo 2-0 lowo mdlalo, igoli lesibili lavalelwa phakathi nguLerato Lamola.
Leli goli alishaya eqethuka, lihlule amagoli awu-70, ashaywa ngoAgasti kwi-Absa Premiership. Ngeshwa izolo uMutizwa akakwazanga ukwamukela umklomelo wakhe ngenxa yesimo ebesiphuthuma ekhaya ngokusho kukaLarsen. Lokho kuholele ekutheni uLarsen kube nguyena owamukela umklomelo wakhe.
“Angingabazi ukuthi igoli lakhe lizobalwa namanye azohamba phambili isizini yonke. URonaldo (Cristiano) ukwenzile lokhu kwababaza umhlaba wonke, wakuphinda noBale (Gareth), naye kwababaza umhlaba wonke. Asibabazeni namanjeke njengoba sekwenziwa ngumdlali wethu,” usho kanje uLarsen izolo.
Ngokusho kukaLarsen, bekungelona kuphela igoli likaMutizwa elihle ngo-Agasti, abekhona namanye. “Amanye amagoli amahle awoRoland Putche odlalela iCape Town City noLuckyboy Mokoena weHighlands Park nabo abashaya amagoli amahle kakhulu. Ngokwami ngibona singabaniki abadlali bethu udumo olubafanele uma beshaya amagoli amahle ngale ndlela lapha ekhaya. Kuyajabulisa ukuthi uKnox, uthole lo mklomelo ngegoli elihle. Ngiyafisa sengathi angaqhubeka nomgqigqo omuhle ngoba uyakwazi ukuwashaya amagoli alolu hlobo,” kubeka uLarsen.
Igoli liyinto eshawayo kwiArrows kwazise noSiphelele Magubane usanda kunqoba umklomelo wegoli elivelele ngesizini edlule.
“Lokhu kuyizinkomba zokuthi sisebenza kanzima kuleli qembu. Ngiyazi lokhu engizokusho ngijwayele ukukusho kodwa siyiqembu elingenazo izinsiza eziningi. Noma kunjalo kodwa senza okungaphezulu kokulindeleke kithina. Lokhu akulula neze kodwa sikwenza njalo. Leli qembu lineminyaka emine libuye kwiNational First Division kodwa liyangena kwiTop 8 ngaphandle kwenkinga,” kusho uLarsen.
NgoMgqibelo i-Arrows izobhekana neBaroka FC emdlalweni we-Absa Premiership ePrincess Magogo Stadium ngo-3.30 ntambama.