UMosimane ugxeke izidubedube
UMQEQESHI weMamelodi Sundowns, uPitso Mosimane, ukugxekile ukusuka kwezidubedube emdlalweni wezakhe ne-Orlando Pirates ngempelasonto kodwa wazishaya isifuba ngokusindisa “impilo” yomlandeli wezakhe obesho ukuqedwa yibhentshi leZimnyama.
ISundowns nePirates badlale ngokulingana ngo 0-0 emdlalweni we-Absa Premiership eLoftus Versfeld Stadium, ePitoli, ngoMgqibelo. Ngalokhu amaBrazilians aphunyukwe yithuba lokusondela kwiPirates ehlezi esicongweni se-log yePremiership.
Ukungahoshelani kwamaqembu kuhlale obala zibekwa ngesikhathi kuvela ukuthi onogada banqabele ibhasi lePirates ukuthi lingene enkundleni. Kusuke esinamathambo ngesikhathi umlandeli weSundowns eqonda ebhentshini lePirates, wagcina eselanyulelwa yibhentshi lamaBrazilians, sekundiza nezibhakela. Kumasizini edlule, la maqembu edlala eLoftus, abalandeli bePirates bangena enkundleni bahlasela abadlali babo ebhentshini. ISundowns yawina ngo 6-0.
UMosimane uthe ubezitshela ukuthi sekuyaphinda lokho emdlalweni wangoMgqibelo. “Ngibone abantu abaningi abebegqoke okumnyama okunokumhlophe beza kimi. Ngibonile ukuthi uma ngibaleka bazongisobozela. Bekufanele ngihlasele. Ngenze lokho. Abantu abaningi bebeza kimi, ngabadudula. Bekufanele ngenzanjani? Bekungafanele kwenzeke okwenzekile. Ngagcina ukubona abantu abaningi beza kanje ngesikhathi siwina ngo 6-0 lapha. Kwadingeka ngibaleke ngiyocasha. Akufanele kuphinde kwenzeke. Bengicabanga ukuthi sekuphinda lokho.”
“Ngibone umuntu oyedwa ogqoke okuphuzi ephakathi kwabezimnyama ezinokumhlophe ngathi ngeke ngikuvumele ukuthi asobozelwe, kufanele ngimvikele. Ngebhadi yimina obeseduze kakhulu. Bekufanele ngimvikele ngoba ubejahwa yinqwaba yabagqoke ezimnyama ezinokumhlophe. Ubebaleka. Ngabona ukuthi angimsize. Umuntu oyedwa nje obezijabulele. Ukuba angiyanga laphayana bebezomsobozela. Ngisindise impilo yakhe,” kusho uMosimane.
Umsindo wokunqatshelwa kwebhasi yePirates ukungena enkundleni uphethe ngokuthi ipakwe endaweni kaMosimane nokuyinto engamthokozisanga.
“Ngifice ibhasi yePirates ipake lapho ngipaka khona. Ekhaya ngibafice bepake endaweni yami. Ngiphoqekile ukuthi ngipake ngaphandle, ngingene enkundleni ngezinyawo. Kodwa siqhubekile sabahlonipha. Lena yiLoftus, akuyona i-Orlando Stadium. Emzini wami awukwazi ukupaka noma yikuphi. Kodwa angibasoli, ngigxeka onogada bethu. Ungaya e-Old Trafford upake khona? Lokhu akwemukelekile. Bese kuthiwa yiSundowns edala izinkinga.”
Mayelana nomdlalo wangoMgqibelo uMosimane uthe ubengeke ayivumele iPirates icanase njengoba yenza kwamanye amaqembu.
“Uma udlala ekhaya ufuna ukuwina. Siphoxekile ngokudlala ngokulingana. Ngicabanga ukuthi sidlale kahle. Sidlale neqembu elihlale licanasa kuwona wonke amaqembu. Besingafuni ukukuvumela lokho. Kudingeke sibacindezele phambili, siphoqe uMpontshane (Siyabonga) ukuthi ashaye