Inkosi isola umnyango kolombango wezinduna
IYAVEVA inkosi yakwaNgobese eNquthu esola uMnyango wezokuBusa nokuBambisana neziNdaba zoMdabu ngombango wezinduna osuphazamisa imihlangano yentuthuko.
Lokhu kulandela uthuthuva oluqubuke emhlanganweni obubizwe yinkosi uThathezakhe Ngobese kwaLuvisi ukuba kuzochazelwa umphakathi ngesinqumo sokuxoshwa kukaMnuz Bhekizenzo Ngobese ukuze kufakwe uMnuz Mthandeni Buthelezi.
Abeseka induna uButhelezi bafuna induna uNgobese iyibuyise yonke imali yomholo wanyanga zonke onguR8 000 abeyihola kusuka ngo-2015, exoshwa.
“Sisola ubugebengu kulolu daba, kukhona umkhonyovu owenziwa yinduna uNgobese nezisebenzi zomnyango ngakho sifuna ayibuyise yonke le mali ukuze ibuyiselwe kuButhelezi. Asikwazi ukuthula sibuke kusatshiswa uButhelezi sikhona ngoba naye uzele,” kusho omunye wamalungu omndeni kaButhelezi.
Abaseka uNgobesenabo bayabhoka njengoba bethi abazi ukuthi inkosi yayixhumane nobani ngesikhathi imxosha esikhundleni.
UNgobese uthe akazicelelanga ukuhola kodwa izikhulu zoMnyango wezokuBusa nokuBambisana neziNdaba zoMdabu ehhovisi lesifunda eliseDundee ezimcelile ukuba asayine ukuze ahole. Uthe yena ngeke ayeke ukubiza imihlangano ngoba uzombopha uhulumeni ukuthi udla imali yakhe engasebenzi.
UButhelezi ukhala ngokuthi usephazamiseke kaningi ezama ukubiza imihlangano yentuthuko. Inkosi uNgobese iyaveva ngalesi simo. “Uyazi kuyona yonke le nto ngisola izisebenzi zomnyango ezixova izinto. Mina ngixoshe umuntu esikhundleni zona zamkhokhobisa zayomsayinisa ngaphandle kwami ehholo iVA Makhoba. Ngisho intsha ibikhuluma ekuthandayo ngami. Mina ngabizwa yizikhulu zomnyango ngalolu daba ngazichazela ukuthi uNgobese akaseyona induna sengimxoshile. Zasuka zathi uma ngingamsayineli ayikho induna yami ezohola. Ngabona ukuthi kungaba wubulima ukungasayini bese kulimala zonke izinduna ngomuntu oyedwa ngagcina ngisayina. Namanje ngibabuzile ukuthi lisafunani igama likaNgobese ngoba akasiyo induna kunesikhulu esingitshele ukuthi ikhompyutha emfakile ngabuza ukuthi kanti ikhompyutha lena ayisetshenziswa yini abantu,’’ kusho inkosi uNgobese.
Okhulumela umnyango, uMnuz Lennox Mabaso, uthe ngokwemininingwane yabo uNgobese waphuma esikhundleni ngo-2015.
Uthe bona njengomnyango abahlangani nokuqokwa noma ukuxoshwa kwezinduna ngoba ezamakhosi ngakho uma ixoshiwe kusuke kuyilungelo lenkosi ukwenzenjalo abayiphikisi.