Asiyiphuphi ngisho silele eyokudliwa yizembe: Freese
OMUNYE wabaqeqeshi beHighlands Park, u-Allan Freese, utshele abezindaba ukuthi ukucabanga ngokudliwa yizembe yinto engekho emiqondweni yabo ngisho ngabe bazihlalele ngaphansi kwesihlahla bazipholele kuleli langa elikhipha umkhovu etsheni kulona lonke izwe.
Lokhu uFreese ukusho eseMphithi ngeledlule lapho bephumelele khona ukubuya belandela ngemuva amahlandla amabili kwiMaritzburg United. Lo mqeqeshi onamancoko isikhathi esiningi ubekhuluma ngalokhu nje, ubesiza omunye umdlali wakhe obevalelwe ekhoneni ngabezindaba ngesimo seqembu kusukela kuqale isizini.
“Ningamxini kakhulu umfana ngento engekho. Indaba yezembe asiyicabangi ngisho ngabe sipholile kumbe sishiswa yilanga. Konke okwenziwa yiqembu kuncike ekutheni liphenduke elinye lazinzile esigabeni esikhulu ngakho-ke musani ukuxina umdlali wami ngendaba yezembe ngoba asiyiphuphi ngisho silele,” usho kanje.
Nakuba imiphumela ithembisa kwiHighlands uma ibhekene nala maqembu athathwa njengamakhulu, kusenzima kubona ukuthola amawini. Kusukela kuqale isizini iHighlands isaphumelele ukunqoba imidlalo emibili kwewu-10 esiyidlalile. Idlale ngokulingana kweyisithupha kwase kuthi kwemibili yakhala ngaphansi.
“Iphuzu lingcono kakhulu kunokungatholi lutho. Kusemqoka ukukhumbula ukuthi kusuke kungethina sodwa esilahle amaphuzu (uma sidlala ngokulingana) kepha naleli qembu esisuke sibhekene nalo lisuke liwadinga ngendlela efanayo. Ngibashayela elikhulu ihlombe abadlali bami ukuthi bakwazile ukubuya kwiMaritzburg ngoba bekunzima ngendlela emangalisayo. Ikhona imidlalo esike sizizwe sengathi siwalahlile amaphuzu ngokucazelana nomunye kodwa kulo bekufanele sijabule ngoba bekunzima impela.”
Ube esebuzwa ngezinhlelo nezibalo abazibekele zona kule sizini noma ngokwehlukana kwezigaba zesizini ka-2018/2019.
“Akukho sibalo esizibekele sona ngokwamaphuzu noma ngabe yini esiyifunayo. Okwamanje sisaphazanyiswa amagebe alokhu evuleka uma kunemidlalo yeFifa. Ngeke sikhale kakhulu ngalokhu ngoba kwenzeka kuwona wonke umuntu kodwa sithi sesiqala ukufudumala kuphinde kumiwe. Uma sesibuya lapho sisuke sesifana nabantu abaqale phansi konke. Seneme ngendlela esesidlale ngayo namaqembu amakhulu ngoba yonke le midlalo ibisekuhambeni. Ngokwami lokhu kusho ukuthi uma sesidlalela ekhaya siphoqelekile ukunqoba. Ngaleyo ndlela amqoka kakhulu la maphuzu esilokhu siwathola ikakhulukazi ekuhambeni,” kusho uFreese.
Umdlalo iHighlands ezobuya ngawo ngemuva kwesonto leFifa, uzoba sekhaya lapho izokwamukela khona AmaZulu nawo adonsa kanzima ikakhulukazi ekuhambeni.