Izinguquko kwiSABC Summer Song
UZA nezinguquko umncintiswano wengoma ehlukanisa unyaka, iSABC Summer Song, owagcina ubhuntshile ngemizuzu yokugcina ngonyaka odlule.
Umncintiswano waqala ngo2015 nguNathi Mankayi ngengoma ethi, Nomvula. Kwalandela uMroza Fakude ngo-2016 ngengoma ethi, Elamanqamu (Van Damme).
Nokho ngonyaka odlule wagcina uhoxiswe ngemizuzu yokugcina ngenxa yezinkinga. Kwasuka umsindo kuthiwa Igcokama Elisha yilo obekumele linqobe ngengoma yalo ethi, Jessica.
Umsunguli wawo u-Owen Ndlovu uthe babuya ngamandla kulo nyaka.
“Isiteshi ngasinye sesizoba nesalo uhlu lwezingoma eziwu-10 ezihamba phambili. Wonke umculi ozonqoba khona uzothola uR10 000 ongukheshi. Uma uphume phambili eziteshini ezehlukene uzothola uR10 000 ngokwahlukana. Kusho ukuthi uma uqokwe eziteshini ezinhlanu nje unoR50 000. Lokhu kusho ukuthi umculi ngamunye unamathuba awu-18 okunqoba,” kusho u-Owen.
Uthe umculi ozophuma phambili uma kuhlanganiswa wonke amavoti uzothola uR150 000 nemoto ngaphezulu.
“Ngesonto elizayo sizokwethula kahle zonke izinhlelo zethu, ngikukhela phezulu nje. Sezikhona kodwa izingoma engizwa abantu bekhuluma ngazo njengekaKing Monada iMalwedhe, ekaVusi Nova, uPrince Kaybee, ngizwile ukuthi noKhuzani ukhona,” kusho u-Owen.
Uthe ingoma edle umhlanganiso kulo nyaka izomenyezelwa emcimbini ozoba seSasolburg ngoDisemba 31.