Aphelile amaqhinga kaGigaba
PHEZU kokuba wayefunge wagomela ukuthi akasoze asula esikhundleni sakhe kodwa uzolinda ukuhoxiswa yi-ANC, izolo uMnuz Malusi Gigaba (47) obenguNgqongqoshe wezaseKhaya, ugcine esishiye phansi isikhundla.
Engxoxweni ekhethekile neSolezwe ngeledlule, uGigaba wathi akaziqokanga ngakho ngeke azehlele esikhundleni kodwa uzolinda i-ANC noma uMengameli wayo, uMnuz Cyril Ramaphosa, ukuthi amhoxise.
Bese kukaningi ecelwa ukuthi ahoxe esikhundleni ngenxa yezigigaba zakhe okubalwa kuzo ukusabalala kwevideo eziphulula ubuntu bakhe athi wayeyithumela inkosikazi yakhe, uNkk Nomachule Gigaba, kodwa yaputshuzwa ngabafuna ukumkhipha esikhundleni.
Ihhovisi likaRamaphosa likuqinisekisile ukuthi uGigaba usulile esikhundleni ngoba ecabangela iNingizimu Afrika ne-ANC ayilungu layo.
“Ngiyasula ukwehlisa ingcindezi kuMengameli ukuze akwazi ukuqhuba umsebenzi wokuthuthukisa impilo yabantu baseNingizimu Afrika nokusimamisa umnotho,” kusho uGigaba esitatimendeni.
URamaphosa uthe uNgqongqoshe wezokuThutha, uDkt Blade Nzimande, uzobamba njengoNgqongqoshe wezaseKhaya.
UMengameli ubonge uGigaba ngokusebenzela abantu baseNingizimu Afrika esho nokuthi usebenze ngokuzikhandla.
UGigaba uke wabhekana nezigigaba eziningi njengoba kuke kwavela ukuthi uneakhawunti e-Dubai ngesikhathi esenguNgqongqoshe wamaBhizinisi kaHulumeni kodwa kwavela ukuthi akahlangene nayo.
Ngo-2007 eseyiPhini likaNgqongqoshe wezaseKhaya uGigaba wacelwa ukuthi abuyise uR1 000 ayethenge ngawo izimbali zeValentines Day ayezinikeze owayeyinkosikazi yakhe uNokuthaba.
Ngo-2014 wagxekwa ngokwethula imithetho eqinile kwabafuna ukuvakashela iNingizimu Afrika ethi kufanele bazifakele izicelo ngokwabo ezindlini zamanxusa.
Waphinde wasolwa ngokuthi wanika umndeni wakwaGupta ubuzwe baseNingizimu Afrika yize wawungenazo izimfanelo.
Uke wasolwa nangokusondelana nomndeni wakwaGupta kakhulu okuthiwa wayevakasha njalo emzini wawo oseSaxonwold, eGoli.
Ngo-Okthoba 27, 2018 inkantolo iNorth Gauteng High Court inqume ukuthi waqamba amanga ebe efunge ukuthi uzokhuluma iqiniso uma ethi akayinikanga inkampani yakwa-Oppenheimer iFireblade igunya lokusebenzela e-OR Tambo.
Uphinde wasolwa ngokungawenzi kahle umsebenzi ngesikhathi ephethe amabhizinisi kahulumeni ngokuthi wayeka izikhulu ukuthi zidle imali. Usolwa ngokuqokela uMnuz Iqbal Sharma ebhodini yakwaTransnet elaqoka uMnuz Brian Molefe ngo-2011. Kuthiwa ibhodi yathula ngesikhathi kuthengwa izitimela ngoR25 billion enkampanini yaseChina.
Usolwa ngokushiya i-Eskom ingenamali ebe kade eyifice inoR19.6 billion owukheshi nempahla ebizayo kodwa wayishiya ngo-2014 isicela imali kuhulumeni.
UGigaba uphinde asolwe ngokuwisa iSAA ngokungazithatheli phezulu izinqumo zikaNkk Cheryl Carolus owayenguSihlalo weBhodi.
Ngonyaka odlule iSAA itakulwe ngoR5 billion ukuze ikhokhele izikweletu zayo.
Ngaphandle kwezigigaba kuhulumeni, uGigaba ubebuye abe nezigigaba empilweni yakhe yangasese. Ngo-2017 owayeyisinqandamathe sikaGigaba, uNksz Buhle Mkhize, wabiza umkakhe ngexoxo emuva kwengxoxo eshubile eyayiphakathi kwabo ezinkundleni zokuxhumana.
UNksz Mkhize wathi unamafayela amaningi kaGigaba ngoba ubemnakekela futhi emusa emaholidini abizayo.
Isigigaba sokugcina esokuvela kwevideo kaGigaba eziphulula ubuntu bakhe.
Phezu kwakho konke uGigaba ubeyintandokazi yabesifazane akade bethanda ubuqhozoba bomzimba wakhe, isitayela sakhe sokugqoka. Uma kuvulwa iPhalamende ubegqokisa kuhle komuntu oya emjahweni wamahhashi okulandelwa kuwo indikimba ethile.
Umhlaziyi wepolitiki ozimele, uMnuz Thabani Khumalo, uthe kudala belindile ukuthi uGigaba asule ngoba bezisazomnetha ukube ubeqhubeka nokuhlala esikhundleni.
“Igama lakhe beliphezulu ekulawulweni kombuso yidlanzana, angimboni ebuya kwipolitiki. Kufanele abheke kwezamabhizinisi. Ubenekusasa elihle kodwa wadlala amakhehla nezalukazi ayesebenzisa umbuso ukufeza izinhloso zawo. Kunesikhathi lapho bekucatshangwa ukuthi uGigaba