Kuboshwe ‘obegila’ indodakazi yakhe
ZIMKHALELE owesilisa (38) waseMthwalume osolwa ngokudlwengula indodakazi yakhe angayizali ephindelela nasolwa ngokuyikhulelisa.
Kuthiwa owesilisa, ophinde abe ngubaba omncane wale ngane (14) ngoba bezalwa ubaba oyedwa noyise wayo owashona, waqala ukuyidlwengula ineminyaka eyisishiyagalolunye.
Unina wale ngane (38), ogama lakhe ligodliwe ukuvikela umgilwa, uthe ushaqekile ngesikhathi ethola ukuthi owesilisa ophinde abe nguyise wendodana yakhe eneminyaka emihlanu asahlukana naye udlwengule indodakazi yakhe.
“Bengilokhu ngiyibona ingane ukuthi umzimba wayo ushintshile ngase ngiyayibuza ngoLwesihlanu oludlule yangitshela ukuthi ikhulelwe nokuthi ubabomncane wayo ubeyidlwengula,” kusho unina wengane.
Uthe indodakazi yakhe iveze ukuthi lo mlisa uqale ukuyidlwengula ngo-2013. Ngokusho kwayo ubeyidlwengula emini uma engekho unina esemsebenzini nokuyisimo esiqhubeke kwaze kwaba nguJuni nonyaka.
Uthe babikele amaphoyisa ngoLwesihlanu ngalesi sigameko nokuholele ekutheni owesilisa agcine eboshiwe ngoMsombuluko.
Uthe indodakazi yakhe itshele amaphoyisa ukuthi umsolwa ubeyisabisa kodwa yangasho ukuthi ubethini.
Uveze ukuthi bese kuneminyaka ethandana nowesilisa obengumfowabo womyeni wakhe owashona ngo-2008 kodwa bese kunesikhathi behlukene.
Uthe ubengasoli ukuthi udlwengula indodakazi yakhe njengoba ethe ubengumuntu obekhombisa ukuthi uyazithanda izingane futhi engumuntu obekhombisa ukubanakekela yize ebengasebenzi. “Ubengumuntu onosizo endlini kungathi izingane uyazithanda. Nengane yethu encane ubevame ukuthi ayiphelezele uma iya esikoleni. Bengingazitsheli nje ukuthi angenza le nto. Ngiphatheke kabuhlungu kakhulu,” kusho unina wengane.
Uthe indodakazi yakhe ididekile futhi ayikho esimeni esihle kodwa bayazama ngayo yonke indlela ukuthi bayeseke.
Okhulumela amaphoyisa, uLt Col Thulani Zwane, ukuqinisekisile ukuthi kuboshwe owesilisa osolwa ngokudlwengula ingane ephindelela. Uthe icala livulwe esiteshini samaphoyisa eHibberdene ladluliselwa ophikweni oluphenya amacala athinta udlame lwemindeni, ukuvikelwa kwezingane namacala ocansi ePort Shepstone.