Amaqembu amukele ukwesula kukaGigaba
AMAQEMBU ezepolitiki kubalwa nePhalamende asamukele isinqumo sokusula kobenguNgqongqoshe wezaseKhaya uMnuz Malusi Gigaba izolo.
Amanye amaqembu athe nabanye ongqongqoshe kumele basike iphethini balandele uGigaba basule ngoba bahlaze izwe.
USihlalo weKomiti lezaseKhaya ePhalamende, uMnuz Hlomani Chauke, uthe bayakwamukela ukusula kukaGigaba kulandela umbiko woMvikeli woMphakathi nesinqumo seNkantolo yoMthethosisekelo.
Umbongile ngeminyaka ayisebenze naleli komiti nemikhankaso aqhamuka nayo yokuphucula uMnyango wezaseKhaya.
“Sizolinda ozojutshwa kulo mnyango sizosebenzisana naye ukuze kuthuthukiswe abantu bakuleli.”
Umholi we-DA, uMnuz Mmusi Maimane, uthe abanye ongqongqoshe okubalwa uNkk Bathabile Dlamini kumele basule.
“Siyasamukela isinqumo sokusula kwakhe kodwa nabanye ongqongqoshe kumele bahambe naye. Akumele abantu baze bavunyelwe basule kumele baxoshwe uma kukhona abangakwenzanga kahle,” kusho uMaimane.
Okhulumela iSACP, uMnuz Alex Mashilo, uthe bayasamukela lesi sinqumo sikaGigaba wathi ikakhulu njengoba ethe lokhu ukwenzela izwe.
“Siyajabula ngoba akazange afake ingcindezi engenasidingo kumengameli ngoba kudingeka abhekane nokuphucula izimpilo zabantu akhiphe nezwe enkingeni yomnotho ozikayo.”
UMnuz Nqabayomzi Kwankwa we-UDM uthe ibingekho enye indlela ngaphandle kokuthi asule.
Uthe noMengameli Cyril Ramaphosa ubengenayo enye indlela ngaphandle kokuthi amkhombe indlela kulesi sikhundla.
“Waqamba amanga efungile ePhalamende ngakho bekumele ahambe. Kuzoba ngcono ngoba izophela indaba yokuthi kulokhu kugxilwe ezintweni ezingahlangene nomsebenzi wezaseKhaya njengoba bekugxilwe kuGigaba nezinto azenzile kodwa manje sekuzogxilwa ekuthuthukiseni abantu.”
USihlalo weNFP KwaZuluNatal, uMnuz Vikizitha Mlotshwa, uthe kumele ngabe kade asula wathi bayasamukela lesi sinqumo.
Uthe lesi sinyathelo sizoletha uzinzo emnyangweni wathi ukholwa ngukuthi into emsulisile indaba yokuphakamisela elinye ilungu lePhalamende, uDkt Mbuyiseni Ndlozi, umunwe.
“Sikholwa ngukuthi umengameli uzoqoka umuntu onamava kulo mnyango ngoba sinabantu bokufika abakuleli ngaphandle kwemvume abangu-11 million okuwukuhluleka kukaGigaba.”
UMnuz Dennis Bloem, okhulumela iCope, uthe kwakumele asule ngesikhathi sowayengumengameli, uMnuz Jacob Zuma wathi kwakungamele aqokwe nguRamaphosa.
“URamaphosa uyahluleka ukuthatha izinyathelo ezinqala kanti siyakwamukela ukusula kwakhe,” kusho uBloem.
UMnuz Narend Singh, we-IFP, uthe uGigaba wenze okufanele ngokuthi asule esikhundleni.
Uthe usindise uRamaphosa ngokuthi azisulele ngoba bekuzodingeka ukuthi amxoshe.
Okhulumela i-EFF uNdlozi uthe bayakwamukela ukusula kukaGigaba wathi nguyena muntu obeyinjini yokulawulwa kombuso yidlanzana ngaphansi kukaZuma.
Uthe ubeyisichuse somndeni wakwaGupta ngoba wanika lo mndeni ubuzwe.
“Sethemba ukuthi ngomuso umengameli uyoqoka umuntu omncane ozohola lo mnyango hhayi abantu abadala asebekhathele.” kusho uNdlozi.
Okhulumela i-ANC uMnuz Pule Mabe uthe uGigaba uthathe isinqumo sokusula ngemuva kokuxoxa noRamaphosa, wathi lesi sinqumo sizobuyisa isithunzi senhlangano.
Uthe isinqumo sokusula siqinisa intando yabantu ngokubeka izwe phambili.
“Lokhu kuzomnika isikhathi sokuthi abhekane nezinkinga zakhe. Uzoqhubeka abe yilungu lesigungu esiphezulu senhlangano,” kusho uMabe. THUMELA umbono ngalolu daba kuFacebook (Isolezwe), kuTwitter (@isolezwenews) noma umqhafazo ku-45773. I-sms ibiza R1,50.