Awezepolitiki agqugquzelwe yi-IEC ukushela abavoti
AMAQEMBU ezepolitiki KwaZulu-Natal azibophezele ukuthi njengoba kuyiwa okhethweni ngeke aphazamise izinhlelo zamanye amaqembu uma sekukhankaswa.
Lokhu kuvezwe yisikhulu sekhomishini yezokhetho esifundazweni i-Independent Electoral Commission (IEC) uMnuz Mawethu Mosery njengoba bekunomhlangano wamaqembu ahlukene eLindelani, KwaDukuza.
UMosery, oyiPhini likaSihlalo wekomiti elihlanganisa wonke amaqembu esifundazweni, uthe amaqembu azibophezele ekutheni azokhankasa ngokuthula.
“Sibakhumbuzile ukuthi njengoba kulesi sifundazwe kunabavoti abangu-5.3 million kudingeka isikhathi esiningi basichithe beshela laba bantu ukuthi babavotele. Akumele isikhathi esiningi sichithwe kuphazanyiswa eminye imikhankaso yamanye amaqembu,” kusho uMosery.
Uthe abaholi abebekhona bazibophezele ekutheni kuzoba nokubekezelelana uma sekukhankaselwa lolu khetho okulindeleke ukuthi lube ngoMeyi ngonyaka ozayo.
Uqhube wathi uhulumeni, obumelwe nguNgqongqoshe wezemfundo uMnuz Mthandeni Dlungwane, obemele uSihlalo waleli komiti, uMnuz Mxolisi Kaunda, onguNgqongqoshe wezokuphepha uzibophezele ekutheni kuzoba nokuthula uma sekuvotwa.
“Uhulumeni uzibophezele ekutheni kuzoba nokuthula kuze kufike ukhetho. Leli komiti lakhiwa ngo-2011 kanti uhulumeni wesifundazwe wabona kunesidingo sokuthi liqhubeke lisebenze ukuze uma kunezinkinga zamaqembu zibhungwe kulona,” kusho uMosery.
Uthe banxuse abaholi ukuthi bagqugquzele abantu ukuthi bahambe bayolungisa amakheli emqulwini wokuvota.
Uma ungenalo ikheli emqulwini wokuvota ngeke ukwazi ukuvota ngonyaka ozayo.
“Siyikhulume kakhulu eyokuthi abantu bahambe bayolungisa amakheli, abanangaphelele kuthi labo abangenawo nhlobo bawafake ukuze bakwazi ukuvota. Bangu-323 000 abantu esifundazweni abangenawo amakheli okudingeka ukuthi bawafake ukuze bakwazi ukuvota.”
Uthe babe sebengena begxila kwezinye izifunda ngendaba yamakheli.
“NjengaKwaDukuza bangu-20 000 abantu abangenawo amakheli yingakho sibanxusa abantu ukuthi bazibheke ukuthi banawo yini amakheli. Amaqembu nawo azibophezele ekutheni azolishumayeza ivangeli lokuthi abantu babhalise amakheli.”
Uthe abantu bazokwazi futhi ukugcwalisa amakheli ngempelasonto yangoJanuwari 26 no-27 ngonyaka ozayo lapho kuzovulwa khona iwindi lokuthi bakwazi ukubhalisela ukhetho.
Kuzoba yithuba lokugcina leli langonyaka ozayo ukuthi abafuna ukuvota babhalise.
Ongabhalisile akakwazi ukuvota.
Bangu-11.4 million abantu kulesi sifundazwe, abangakwazi ukuvota bangu-6.6 million kodwa ababhalisele ukuvota bangu-5.3 million.