Kumele nabesilisa bazinake
KUJWAYELEKILE ukuthi uzwe owesilisa ethi akahambisani nemfashini ngoba ingeyabesifazane. Lokhu kwenza ukuthi abanye bagqoke noma yini abacabanga ukuthi ihambelana nabo. Umsiki wengqephu we-AFrolicious Designs, uMamsie Mkhwanazi, uthi nabesilisa kumele bazinake indlela abagqoka ngayo. Uthe akudingeki uze uhambisane nemfashini noma uchithe imali eningi kodwa ungabukeka kahle ngalokhu onakho. Unikeze amanye amathiphu angasetshenziswa abesilisa abafuna ukubukeka kahle. Nanka amanye amathiphu ngezansi.
*Ophaqa namateku.
Ophaqa akubona neze abokugqokwa nejini. Yize sibonakala singenile lesi sitayela ikakhulukazi kubafana abancane, lokhu akubukeki kahle. Ophaqa ungabagqoka kuphela nezikhindi. Izicathulo ezibizwa ngamaCrocs akuzona ezokuswenka kodwa zinhle ebhishi. *Ibhulukwe Yazi umehluko phakathi kwebhulukwe lokuswenka nelokuphola. Ungalokothi ugqoke ibhulukwe lokuswenka namateku noma nophaqa. Yijini enombala o-navy kuphela ongayigqoka nezicathulo uma usemcimbini wokuswenka. Kuhle uma uyigqoka nezicathulo ezinsundu, ihembe elimhlophe nebhantshi elinombala. *Ibhande Lingakwenza ube muhle noma ube mubi uma ugqokile. Ibhande malifane nombala wezicathulo ngaso sonke isikhathi. Amabhande aphambanayo okubamba ibhulukwe abizwa ngama-Suspender, agqokwa wodwa awalidingi ibhande lebhulukwe. Abukeka kahle uma ugqoke ibhulukwe lokuswenka
nobhothayi. *Isudi Kumele ube nayo isudi emnyama noma empunga ngoba ingakutakula noma yikuphi. Njengoba abesifazane betakulwa yingubo emnyama, kwabesilisa yisudi emnyama. Ungayigqoka kunoma yikumuphi umcimbi. Udinga ihembe elimhlophe bese ushintsha imibala kothayi uma uya emicimbini ehlukene. *Amasokisi Yize engenisile amasokisi ayimibala abizwa ngamahappy socks, akuwona akanoma ngubani. Mahle kwabesilisa abasebasha abahambisana nemfashini. Qikelela ukuthi amasokisi amesha ibhulukwe noma isicathulo ngaso sonke isikhathi. *Iwashi nesikhwama Iwashi lingakwenza ubukeke uswenkile futhi uhloniphekile. Makube yiwashi elikhulu elizogqama esihlakaleni. Zikhona nezikhwama zabesilisa kodwa kumele sihambisane nendlela ogqoke ngayo. Kukhona ama-sling bag uma ugqoke izimpahla zokuphola noma i-hand bag uma uswenkile. *Isigqoko nezibuko Lokhu kungakwenza ubukeke uswenkile ngisho ugqoke izimpahla ezindala. Ziningi izibuko zabesilisa ezinhle, ezingakwenza ubukeke uhloniphekile unesitayela. Nesigqoko ngokunjalo siyakwenza uqhakaze nezimpahla kube sengathi zintsha. *Amateku Nawo ahlukene, kanjalo nezimpahla okumele agqokwe nazo. Kukhona amateku alungele kuphela ukuzivocavoca nokugijima. Amanye ungawagqoka uma upholile nesikhindi noma ijini. *Usayizi Ukwazi usayizi wakho wezingubo akwanele. Kuyadingeka ukuthi ulinganise uma uthenga esitolo. Kubukeka kabi uma ibhantshi noma ibhulukwe likuyeka kakhulu. Kumele izimpahla zihlale kahle emzimbeni. *Izikibha Isikibha esinesiphika asigqokwa nebhantshi noma nebhulukwe lokuswenka. Ungasigqoka kuphela nejini noma isikhindi. Zikhona izikibha ezinhle ezingenazo iziphika ongazigqoka ngisho nebhantshi bese uhlobisa ngokufaka umgexo ngaphezulu.