Uvalo kuhlaselwa ofakazi
UTHUKA izanya umndeni wowesifazane obekulindeleke ukuthi abe ufakazi ecaleni lokubulala okuthiwa uhlaselwe izigebengu zamdubula, wagcina enqanyulwe ingalo.
UNksz Lindiwe Mthethwa (43) waseTrustfeed ngaseWartburg uhlaselwe abantu ekuqaleni kwale nyanga, bamdubula bamshiya bezitshela ukuthi ushonile.
Omunye wesifazane wakule ndawo naye obengufakazi ecaleni lokubulala, kuthiwa kufike abahlaseli kubo kodwa bangamfica ngoba esekubhaceni.
Laba bangofakazi ecaleni lokubulawa kukaMnuz Mbuzo Zondi (22) owabulawa ngoDisemba 24, 2015.
UZondi wayematasa eshisa inyama ngaphandle kwendawo yokucima ukoma eTrustfeed ngesikhathi ehlaselwa, washaywa wabe esegwazwa. Waphuthunyiswa esibhedlela, wafika washonela khona. Icala lavulwa esiteshini samaphoyisa eNew Hanover, kwaboshwa oMnuz Sandile Khumalo (35), Ayanda Khumalo (24), Sanele Shangase (21) noMlungisi Shezi (30).
Abasolwa bebevele ngoMsombuluko enkantolo, icala lahlehliselwa uNovemba 22 nokuwusuku okulindeleke ukuthi liqale ukuqulwa ngalo icala.
Umfowabo kaNksz Mthethwa, uMnuz Bonginkosi Mthethwa, uthe basasaba ngemuva kokuhlaselwa kukadadewabo futhi ababoni ukuthi uyoke abuye endaweni.
“Udadewethu uhlaselwe eyedwa, wadubuleka kabi ngakwesingenhla emzimbeni. Kumanje usesibhedlela, unqanyulwe ingalo ngenxa yalokhu kuhlaselwa. Ube esenquma ukuthi ngeke asakwazi ukubuyela kule ndawo kulandela lokhu kuhlaselwa. Nathi siwumndeni asazi noma abahlaseli basazobuya yini, asazi noma siphephile yini. Siyesaba,” kusho uMthethwa.
Ikhansela lakule ndawo, ku-ward 8, uMnuz Fasties Mbongwa, uthe uze waphoqeleka ukuba abize umhlangano womphakathi njengoba abanye abantu benovalo emuva kwalesi sigameko.
“Amanye amalungu omphakathi avezile ukuthi akhathazekile kakhulu ngokuba kuhlaselwe ofakazi ecaleni lokubulala. Lokhu kuzokwenza bantu basabe ukusebenzisana namaphoyisa. Umphakathi siwucelile ukuba wehlise umoya, amaphoyisa aqhubeke nomsebenzi wawo,” kusho uMbongwa.
Kuleli cala lokuhlaselwa kukaNksz Mthethwa kuboshwe abasolwa abane.
Okhulumela amaphoyisa KwaZulu-Natal, uLt Colonel Thulani Zwane, uthe bazobhekana necala lokuzama ukubulala.
“Owesifazane watholwa enenqwaba yamanxeba okudutshulwa emzini wakhe eTrustfeed. Wayiswa esibhedlela lapho athola khona ukulashwa. Amaphoyisa aseNew Hanover abe esevula icala lokuzama ukubulala.
Amaphoyisa abophe oMnuz Sandile Khumalo (35), Sihle Mthembu (31), Aslam Ndlela (25) no Thobani Ndlovu (26). Bavelile enkantolo yaseNew Hanover ngoNovemba 8,” kusho uZwane.
UKhumalo uboshwe kuwo womabili amacala elokubulala nelokuzama ukubulala kanti kulindeleke ukuthiavele enkantolo nozwakwabo ecaleni lokubulala ngoNovemba 22.
Kusolwa ukuthi uKhumalo nabasolwa bebezama ukucisha ubufakazi ecaleni ababhekene nalo lokubulala, ngokuhlasela ofakazi.