I-SACP izosiza i-ANC kubuyiswe abangenela ukhetho ngokuzimela
I-SACP KwaZulu-Natal isemkhankasweni wokusiza uKhongolose ngokuthi kubuyiswe bonke abangenela ukhetho ngokuzimela ngo-2016 ngoba bengeneme.
UNobhala weSACP uMnuz Themba Mthembu, uthe ziyaqhubeka izingxoxo zokwakha ubumbano ne-ANC futhi zihamba kahle.
UMthembu uthe bebehlangene noKhongolose esifundazweni muva nje bexoxa eyobumbano.
“Siyingxenye yobumbano yingakho besihlangene saxoxa ngezinto eziningi. Sixoxe nangendaba yokuthi kumele sihloniphane singabaholi, singabonakali sixabana nendaba yokuthi labo abaduba bayozimela bodwa iyaxoxwa ukuthi babuyele kuKhongolose,” kusho uMthembu.
Ukusho lokhu esithangamini nabezindaba eThekwini izolo.
Kwenzeka lokhu nje uNobhala we-ANC uMnuz Mdumiseni Ntuli, wathi basemkhankasweni wokuxoxa nabahamba kuKhongolose bayozimela okhethweni ukuthi babuyele ekhaya.
Kuzokhumbuleka ukuthi ike yashuba phakathi kwe-ANC neSACP ikakhulu eNtshangwe njengoba kwakunokubhekana ngeziqu zamehlo.
UMthembu uthe bayayichitha nencwadi esabalele ezinkundleni ezehlukene zokuxhumana lapho okuthiwa unxenxa ukweseka onobhala bezifunda.
“Siyamazi obhale le ncwadi kodwa ngeke simveze.
“Ubhale le ncwadi wathi ibhalwe imina ngoba ngifuna ukwesekwa amagatsha. Siyazi ngalabo abangafuni silwe nenkohlakalo ikakhulu emnyangweni wezolimo. Sizoqhubeka silwe nenkohlakalo sikhiphe amazambane abolile.”
Uthe buhle ubudlelwano phakathi kwamadlelandawonye okuyi-ANC, Cosatu neSanco esifundazweni.
“Le ncwadi iwumsebenzi wabantu abangafuni kuchume ubumbano kumadlelandawonye.”
UMthembu uyigxekile indaba yokuthi abantu abahlala ezindawni zamakhosi bakhokhiswe imali enkulu uma bethenga umhlaba.
“Akumele abantu bakhokhiswe emhlabeni wamakhosi ngoba amakhosi awuphathele abantu umhlaba. Umhlaba owabantu ngakho akumele bakhokhiswe imali enkulu ukuze babekwe.”
Odabeni lwebhange iVBS Mutual uthe bazolinda ikomiti likazwelonke leSACP okuyilo elibhekele lolu daba.
Ubuholi bukazwelonke baphumela obala bathi le nhlangano ayikaze ithole imali kuleli bhange.
Uthe bazoba yingxenye yombhikisho wokulwa nokudilizwa kwabasebenzi baseSABC.
“Siyasigxeka isinqumo seSABC sokudiliza abasebenzi yingakho sizoba yingxenye yombhikisho wokulwa nalokhu. Sizolwa nokuthi lokhu kwenzeke nakweminye imikhakha.”