Kunconywe isikhungo sokusoka sikadokotela
USAZIMISELE ukwenza okukhulu ukuthuthukisa abanye udokotela waseThekwini, indawo yakhe ehlonzwe njengehamba phambili emkhankasweni wokusoka esifundazweni.
UDkt Qiniso Mlita (36) ongumnikazi weNet Q Medical Centre esemgwaqweni uSteve Biko, uchonywe uphaphe ngesikhathi kuzohlolwa indawo yakhe ngesonto eledlule.
Le ndawo evulwe ngonyaka odlule, uDkt Mlita wayiqala ngokusizana nabaxhasi bakhe iSouthern Health Foundation.
UDkt Mlita ozalwa eMthwalume uthe njalo ngonyaka kufika izikhulu ezizohlola izikhungo ezisebenza ngaphansi kwe-United States Agency for International Development. Mayelana nokuvulwa kwale ndawo uthe washiya umsebenzi KwaHlabisa ngoba kukude kakhulu nasekhaya eThekwini, ekubeni unina ubegula. “Ngangisanda kwesula emsebenzini ngafonelwa omunye udokotela engitshela ukuthi kunohlelo lokusoka oluxhaswe yiMelika ukusiza abakuleli ukugqugquzela ukusoka. Wathi bafuna udokotela abazosebenza naye ukuqhuba uhlelo lokusoka,” echaza,
UMlita useqeqeshe odokotela abangaphezu kuka-36 abafakwe kwezinye izindawo zokusoka kanti nasendaweni yakhe uyasoka.
Uthe bangaphezu kuka-500 asebasokile kusukela evule indawo yakhe. Yize enconywa kakhulu ngokusoka, kwelashelwa zonke izifo endaweni yakhe.
Wathola indawo ngaphansi kweDurban University of Technology (DUT), wakha indawo yokusebenzela, ehanjelwa nangabafundi bakhona. Uqeqeshelwe nokukhipha imithi athe wenzela ukuthi wonke umuntu odinga usizo aluthole.
“Ngikukhathalele kakhulu ukuthuthukisa umphakathi nokukhuthaza intsha. Ngihambela izikole nezikhungo zemfundo ephakeme ngigqugquzela abafundi kuyo yonke imikhakha. Ngifisa eminyakeni emithathu okungenani ngibe sengiqashe abantu abangu-60, ikakhulukazi intsha,” echaza.
Kule ndawo yakhe kukhona nodokotela wamazinyo kanti usalinde owamehlo athi ufuna kube ngowesifazane omnyama. Ucelwe nayiDUT ukusiza ohlelweni lokuqeqesha abasebenzi kwezobuholi nokuthi alethe ushintsho emtholampilo wayo.
Uphinde abe yiPhini likaMengameli weConvocation e-University of KwaZulu-Natal. Usebenzisana noDkt Aubrey Mokoape emkhankasweni wokushintsha iDurdoc Centre eThekwini.
UDkt Mlita uqede umatric eMandlenkosi High eLindelani, wenza iBsc kwiMedical Science e-University of Zululand, neHonours Degree yeBioChemistry ngaphambi kokudlulela e-University of KwaZulu-Natal, eNelson R Mandela Medical School.
Usebenze ePrince Mshiyeni esaqeqeshwa wabuye waba sesibhedlela eHluhluwe.
Kumanje usezinhlelweni zokuba nama-ambulensi athe azosebenza kakhulu ezikhungweni zemfundo ephakeme.