Osomatekisi abalande amaphemithi
UMNYANGO wezokuThutha KwaZulu-Natal ugqugquzele osomatekisi ukuba balande amaphemithi abo ukuze bagweme ukuboshwa kwamatekisi agcina eselandwa ephawundini.
UMnuz Mluleki Mtungwa, obhekelele ezokuxhumana eMnyangweni wezokuThutha KwaZulu-Natal, uthe ziwu-1 404 izimvume zokusebenza ezaziwa ngokuthi amaphemithi esezikhishelwe osomatekisi ababefake izicelo zokusebenza ngaphambi kuka2016.
Uthe ziwu1 023 izimvume zokusebenza ezisasetshenzwa bese kuthi eziwu-12 zihoxisiwe.
Ziwu-2 772 izicelo zezimvume umnyango osuzitholile kodwa ongakasenzi izinqumo ngazo. “Umnyango uhambela izifunda ezehlukene ngokubambisana neSantaco ukugqugquzela osomatekisi ukuthi balande izimvume zabo zokusebenza. Kubalulekile ukuthi bazilande izimvume ngoba lokhu kusiza amaphoyisa uma enezivimbamgwaqo ukubona ukuthi yiziphi izimoto ezingenazo izimvume,” kusho uMtungwa.
Uthe kunamahhovisi akhipha amaphemithi akuzo zonke izifunda. Bavule elinye eMbazwana elizosiza abantu baseMkhanyakude.
“Phambilini abantu bebehamba amabanga amade beya eMgungundlovu uma bedinga izimvume zokusebenza kodwa manje kunamahhovisi azenzayo eMpangeni, Ladysmith, Port Shepstone, naseMbazwana. Sizovula elinye eThekwini kungakapheli unyaka wezimali esikuwo. Sigqugquzela osomatekisi ukuba bafake izicelo zezimvume zokusebenza emahhovisi aseduze nabo ukuze sizoqedela isigaba sesithathu sokukhishwa kwazo,” kusho uMtungwa.