Mabathathelwe izinyathelo abashise iWiggins Secondary
BADINGA ukuthathelwa izinyathelo ezinqala abashise isikole samabanga aphezulu iWiggins Secondary, eMayville, eThekwini. Lesi senzo sobudlova nobuqaba kasibona ubugebengu nje kuphela kepha sibeke engozini impilo yabafundi nothisha futhi sibuyisela emuva intuthuko.
Kusolwa okuthiwa bafuna umhlaba lesi sikole esakhiwe kuwo kanti ezinyangeni ezimbili ezedlule sike sabika ngokucekelwa phansi kwaso ngabantu ababethi bafuna ukwakha imijondolo emhlabeni okwakhiwe kuwo isikole.
Ukushiswa kwesikole kuholele ekutheni ngoMsombuluko abafunda u-matric babhale iphepha leLife Sciences begadwe amaphoyisa ngenxa yovalo lokuthi kungaphinde kusuke uthuthuva lwangayizolo.
Njengoba kubhalwa u-matric kwezinye izikole abafundi batadisha ebusuku belungiselela ukubhala, nakhona eWiggins bekunabafundi abebetadisha ngenkathi kutheleka izigcwelegcwele zizomosha.
Abafundi baze bacisha ugesi ekilasini abebekulo ukuze kungabonakali ukuthi kukhona abantu abangaphakathi, mhlawumbe ngabe kukhulunywa okunye manje.
Noma bengalimalanga abafundi nothisha kepha sebethuka izanya futhi nababhala u-matric ngoMsombuluko babhale esimeni esingesihle besashaywa wuvalo ngabakubone kwenzeka ebusuku.
Siyazibuza kepha kasiyitholi impendulo yokuthi ngumuntu onjani ngempela oshisa isikole ngoba nakhu efuna ukwakha umjondolo?
Silibona liphansi kakhulu izinga lokucabanga okuphusile kubantu abebeyingxenye yalesi senzo sobukhotheni.
Singakangeni nje kumonakalo obangwe yilobu budlova, kumanje isikole kumele siqinisekise ukuthi ukubhala kuka-matric kuyaqhubeka phezu kwalesi simo siphinde silungiselele nabafundi bamanye amabanga ukuthi bazobhala kanjani kuphi.
Abantu abenze lokhu kabafanele ukuhlala emphakathini ngoba babuyisela isizwe emuva bamosha nekusasa lezingane zethu ngokwehluleka kwabo wukucabanga.
Siyethemba zizobanjwa maduze lezi zigilamkhuba.