OwezeMpilo sekuseduze uvale izikhala
KULINDELEKE ukuthi ziphothulwe ungakapheli unyaka izinhlelo zokuvalwa kwezikhala ezibalulekile kuMnyango wezeMpilo KwaZuluNatal.
UNgqongqoshe wezeMpilo uDkt Sibongiseni Dhlomo uveze ukuthi zizophothulwa kungekudala izinhlelo zokuqasha inhloko yoMnyango wezeMpilo nongamele ezezimali uChief Financial Officer (CFO) nokuyizikhala obese kunesikhathi zingavaliwe.
Uthe lezi zikhala zizogcwaliswa noma yinini uma sekuphothulwe imicikilisho yokuqasha okufanele ilandelwe.
Ubale nesikhala esivulekile somphathi wesibhedlela iKing Edward VIII naso athe sizovalwa kungekudala.
UDhlomo uthe ukubone kubalulekile ukuthi acacise ngokuthi sekuhanjwe kangakanani ngokuvalwa kwalezi zikhala ngoba ubevame ukuthi athole imibuzo ngokuthi zizovalwa nini.
Uthe ufuna ukukuhlanganisa ukubikwa ngokuqokwa kwenhloko yomnyango, ukuqokwa kobhekele ezezimali, nokuqokwa kozophatha isibhedlela iKing Edward VIII ngoba ethi lesi sibhedlela singesinye sezibhedlela ezinkulu esifundazweni futhi simandla nasekuqeqesheni (abasebenzi bezempilo).
“Izinhlelo zokuvalwa kwalezi zikhala sekungasemaphethelweni futhi nginethemba lokuthi ngaphambi kokuthi kuphele unyaka noma ngaphambi kukaDisemba 5 sobe sesikhiphe isimemezelo ngazo,” kusho uDhlomo.
Uthe ezinye zalezi zikhundla zidinga ukuthi ziyiswe kwiKhabhinethi ukuze kuqhathaniswe, kuvunyelwane bese kuqokwa umuntu.
Okwamanje isikhundla senhloko yomnyango sibanjwe nguDkt Musa Gumede emuva kokusula kukaDkt Sifiso Mtshali, osule ngonyaka odlule emuva kokuthi emisiwe kulandela izinkinga ezazithinta imishini yomdlavuza.
Nesikhundla sophethe ezezimali kulo mnyango bese kuphele iminyaka elinganiselwa kwemithathu singavaliwe nobese kuholele ekutheni umnyango uzithole umpintsheleke ekhoneni ngenxa yemibuzo ngokugcwaliswa kwalezi zikhala zombili. Phambilini abaholi bamaqembu ezepolitiki bazwakalisa ukukhathazeka ngokungagcwaliswa kwesikhala senhloko yomnyango nesophethe ezezimali ngoba bekhala ngokuthi ngezinye ezibalulekile ukuze umnyango ukwazi ukusebenza ngendlela efanele.
Ngaphandle kwalokhu uphinde waveza ukuthi sekuqashwe omunye udokotela owelapha umdlavuza, uDkt Thandi Lusu. Uthe lo dokotela uzosebenzisana nomunye udokotela ohola izinhlelo zokulashwa komdlavuza, uDkt Shona Bhadree. Umnyango uveze ukuthi omunye wodokotela abebelapha umdlavuza, uDkt Nokwanda Zuma, ucele ukunikwa ithuba lokuthi ayofunda – kodwa lokhu akusho ukuthi useyekile ukusebenzisana nabo ekulashweni komdlavuza.