Uzimisele ngamanye amagoli oweMaritzburg
UDLALE ebanjwe yizinhlungu ezinzima umgadli weMaritzburg United, uYannick Zakri, kodwa waqhubeka ngoba ebuswa isikweletu azizwa enaso kuleli qembu ngakuchaze njengokumtakula nokumamukela ngendlela emenze wabuyelwa ukuzethemba.
Lo mgadli wase-Ivory Coast ufike eNingizimu Afrika ezodlalela iMamelodi Sundowns kodwa izinto zangahamba ngendlela izinhlangothi zombili ebezihlele ngayo okuholele ekutheni abolekiswe kwi-Ajax Cape Town. Ngemuva kokuba i-Ajax isigencwe yizembe, uZakri usayine inkontileka yeminyaka emibili neTeam of Choice.
Kusukela uZakri efikile eMphithi izinto azilihambeli kahle iqembu elibalwa nadonsa kanzima njengoba lisendaweni yesibili uma usuka emsileni we-log ye-Absa Premiership.
Phakathi kwezinkinga ezibhekene neMaritzburg ukungawatholi amagoli. Lokhu kudalwe nawukuthi abadlali abebehlohla amagoli kuleli qembu ngesizini edlule uLebohang Maboe no-Evans Rusike bathole amakhaya amasha ePitoli (kwiSundowns neSuperSport United) ngokwahlukana. Ngenxa yalokhu iTeam of Choice isaphumelele ukunqoba umdlalo owodwa kweyisishiyagalolunye yeligi esiyigijimile. Kule midlalo iMaritzburg isashaye amagoli amane kuphela.
Okuhle ngalokhu wukuthi elilodwa kulawa lingene ngomzuzu ka-23 lishaywa uZakri ngoMgqibelo bebambana neHighlands Park.
Bekungelokuqala kulo mgadli kusukela efikile eMphithi. Ngemuva kwalo mdlalo uZakri uveze okumenze waqhubeka nokudlala yize ebesedonseke umsipha nokubaluleka kokushaya igoli lokuqala edlubhe umfaniswano weqembu alichaza njengekhaya lakhe elisha.
“Akukho okuningi engingakusho ngaphandle kokuthi siyazama futhi sizimisele ngokufela enkundleni ukuze abalandeli bethu bajabule. Ngifike sebeqalile abadlali abaningi kodwa usihlalo neqembu lilonkana bangemukele ngendlela engenze ngabuyelwa ukuzethemba.
“Namuhla ngiqhubeke ngadlala ngizwa ubuhlungu obunzima. Ngidonseke umsipha kodwa ngizizwe nginesikweletu sokuqhubeka ngisize abafowethu ngoba nabo ngiyazi bayokwenza okufanayo uma kulimele mina. Siwumndeni futhi ukuthola kwami igoli okokuqala kungenzeka kuvule uphawini ozokwenza abalandeli bethu bahlale bejabule,” kusho uZakri.