Sizowathola amaphuzu emidlalweni esele: Johnson
USEBHEKE imidlalo elandelayo umqeqeshi waMaZulu FC, uCavin Johnson, ukuzixegisela umthwalo ababhekene nawo kwi-Absa Premiership ngemuva kokuhluleka wukuthola amaphuzu agcwele ekhaya bedlala nePolokwane City phezu kokuwuphatha umdlalo.
Umdlalo obuseKing Zwelithini Stadium, eMlaza, ngempelasonto uphele ngo 0-0. UJohnson uthe yize engeke abasole abadlali ngenxa yokuzimisela kwabo kodwa ubenethemba lokuthi umdlalo yiwo abazoqala ngawo ukushintsha izinto, babuyele ekunqobeni imidlalo yabo.
Usuthu alukawunqobi umdlalo weligi selokhu lwaphucwa amaphuzu ayisithupha ngoSepthemba ngemuva kokulahlwa yiFifa ngecala lokungaholeli umdlali waseNamibia, uPhineas Nambadi. Lunamaphuzu amane emathukwini e-log emidlalweni ewu-10.
Emidlalweni emihlanu esele ngaphambi kokuphela komzuliswano wokuqala weligi, emithathu isekuhambeni kuqala ngoweHighlands Park eMakhulong Stadium ngoNovemba 27. Eminye imidlalo esekuhambeni oweChippa United nowabakhaya iLamontville Golden Arrows.
“Yintaba lena okumele siyiqwale. Siyafisa ukuya kuyona yonke le midlalo yasekuhambeni nomfutho esiwukhombisayo uma sidlalela ekhaya njengoba senzile nanamuhla (ngeSonto). Uma senze njalo ngikholwa wukuthi akhona amaphuzu esizowathola,” kusho uJohnson.
“Ibhola selangifundisa ukuthi awukwazi ukuthi uthi ufuna amaphuzu ayishumi ngoba ekugcineni kungenzeka uthole iqanda. Ngizothi sizoya emidlalweni siyokwenza konke esingakwenza enkundleni. Sethembe ukuthi iNkosi izosibusisa ngamaphuzu.”
Mayelana nomdlalo wabo nePolokwane uthe unesiqiniseko sokuthi nabadlali bakhe abeneme ngamathuba abangawasebenzisanga.
“Besibacindezele kuzona zombili iziwombe. Ngijabule ngokuzinikela. Ekugcineni sithole iphuzu kodwa ngicabanga ukuthi besifanelwe (amaphuzu) amathathu. Namuhla (ngeSonto) bengizitshela ukuthi sizokwenza ngcono. Uma usufika umdlalo esizowunqoba yonke into izoba ngcono,” kusho uJohnson.
Umqeqeshi weCity, uJozef Vukusic, uvumile ukuthi AmaZulu abewuphethe umdlalo nokwenze wagculiseka ngephuzu abalitholile.