Ithe chithi saka imidlalo yabakhaya kweyeMDC
BAZOBHEMA bakholwe abalandeli bakanobhutshuzwayo yimidlalo yabakhaya ethe chithi saka kule mpelasonto kweyeMultiChoice Diski Challenge (MDC).
Kungathi bekwenziwa ngamabomu kuqhathwa iHighlands Park neBidvest Wits, okungamaqembu aseGoli, AmaZulu neLamontvile Golden Arrows baseThekwini neMamelodi Sundowns neSuperSport United okuyizinkunzi zaseTshwane.
La maqembu azobambana ayekane ngoMgqibelo.
Akupheli lapho kwazise nangeSonto kungathi kukhona obecuphe abanemilo eqhatha iBaroka FC nePolokwane City okuyizigayigayi zasePolokwane, iFree State Stars neBloemfontein City nezinkunzi zaseSoweto, iKaizer Chiefs ne-Orlando Pirates.
Ngalo iSonto kukhona nomdlalo weCape Town City emuka nesicoco ezobhekana neChippa United abahosha nayo umoya wolwandle olulodwa.
Impelasonto izovulwa wumdlalo weMaritzburg United neBlack Leopards eHarry Gwala Stadium ngoMgqibelo ngo-10 ekuseni.
Uchungechunge lweyabakhaya lona luzoqalwa yiHighlands neWits abahlangana eMakhulong Stadium ngo-10 ekuseni.
Ngesikhathi esifanayo kuzobe kuvikisana Usuthu naBafana Besthende bobabili ekuhambeni eVosloorus Stadium. Usuku luzovalwa yiShoe Shine & Piano yaBafana Bastyle naMatsatsantsa a Pitori ngo12 emini.
USuthu neWits yiwona maqembu ami kangcono kwi-log kwazothathana ngoMgqibelo kodwa umdlalo weSundowns neSuperSport kulindelwe ushube kakhulu kwazise bayalandelana endaweni yesikhombisa neyeshiyagalombili.
Nangesonto izindaba ziqala ngawo u-10 ekuseni phakathi kweCape Town City neChippa e-Athlone Stadium, bese kanjalo naseVosloorus phakathi kweBakgakga nePolokwane.
ICity, eseqhuliwini le-log, kubhekwe iziphuzele isobho kwiChippa eyibambe endaweni yesithathu uma usuka emsileni.
Khona eVosloorus kuzobe sekulandela iFree State neSiwelele ngo-12 kuthi ngo-2 kusongwe impelasonto ngomdlalo omkhulu ukuyedlula yonke, owobakhaya baseSoweto weZimpofana neZimnyama.
OweCeltic neFree State ufana ncamashi nowabakhaya baseTshwane. Amaqembu aseFree State alandelana endaweni yesine neyesihlanu nokuzokwenza isifundazwe sihlukane phakathi.
KoweZimpofana neZimnyama yilapho kubhekwe kuqhwize khona umentshisi kwazise lo mdlalo ufana nowokwendlalela owe-semi final yeTelkom Knockout ozozamazamisa iNingizimu Afrika yonke ngoNovemba 24.
Lowo-ke useMoses Mabhida Stadium, eThekwini.
Imidlalo ivezwa kwiSS4 neSS10.