Uvalo lokubhuntsha kwemingcwabo kwabafelwe
INOVALO lokuthi kuzobhuntsha imingcwabo yezihlobo zayo imindeni elinde ukuthi kudedelwe izidumbu emakhazeni kahulumeni eFort Napier, eMgungundlovu.
Lokhu kulandela ukuhudula izinyawo kwabasebenzi ngoba bengagculisekile.
Izolo amalungu omndeni wakwaMbatha akhulume naleli phephandaba athe awanalo ithemba lokuthi azofihla kule mpelasonto.
UMnuz Kotshi Mbatha (70) waseMtshezi uthe uqale ukufika emakhazeni ngoMsombuluko ngethemba lokuthi uzothola isidumbu sendodakazi yakhe eshone ngoLwesihlanu oludlule, uNksz Nobuhle Mbatha (20).
Uthe baqale esibhedlela ayelaliswe kuso batshelwa ukuthi abaye emakhazeni aseFort Napier.
UMbatha uthe batshelwe ukuthi izidumbu azihlinziwe ngakho kumele babuye ngoLwesithathu kodwa nayizolo kuze kwashaya izikhathi zantambama bengasitholile.
“Besilokhu silindile sizitshela ukuthi sizosithola isidumbu sengane bese siyafihla ngoLwesihlanu kodwa kubukeka sengathi ngeke sisithole. Kubuhlungu ngoba sesifika okwesibili manje ngoba sitshelwe ukuthi sizoyithola ingane,” kusho uMbatha.
Uthe sebesebenzise imali elinganiselwa kuR900 behla benyuka bezama ukuthola isidumbu. UMbatha uthe bebenethemba ngoba bake baya nasehhovisi likaNgqongqoshe wezeMpilo uDkt Sibongiseni Dhlomo nokuyilapho beshayelwe wungqongqoshe ucingo wabathembisa ukuthi bazosithola isidumbu.
NgoLwesibili uDhlomo, onezicucu zalo mkhakha, uzibambele mathupha ehlinza izidumbu ekhala ngokuthi abasebenzi bahudule izinyawo.
“Sibikelwe ukuthi kunenkinga emakhazeni aseFort Napier lapho abasebenzi befuna ukuphoqa umnyango ukuthi ukhulume izindaba ezikhulunywa esigungwini seBargaining Council kuzwelonke. Sibatshelile ukuthi lezi zindaba ziyakhulunywa. Siyazi ukuthi abakwenzayo akuholwa yinyunyana – ayiyona ingxenye yakho,” kusho uDhlomo.
Umsebenzi ongagunyaziwe ukukhuluma nezintatheli uthe izolo bezilinganiselwa ku-34 izidumbu ezilinde ukuhlinzwa. Uthe abazi ukuthi zizoqedwa nini ngoba udokotela obekufanele azihlinze izolo kuthiwe akaye eThekwini njengoba ezinye izidumbu zihanjiswe khona.
Unobhala wenyunyana yabasebenzi, iPublic and Allied Workers Union (Pawusa) uMnuz Halalisani Gumede, uthe ziningi izinto abanganeme ngazo abasebenzi. Uthe ezinye zezinto abakhala ngazo izimo zokusebenza njengoba ethe kunenkinga yokungasebenzi kwe-airconditioner nokwenza ukuthi bangakwazi ukusebenza ngendlela.
Uthe okunye abasebenzi abakhala ngakho wukuthi uMnyango wezeMpilo wawenze izivumelwano nabo okubalwa kuzo ukukhokhela abasebenzi imali ehambisana nemisebenzi abayenzayo.