‘Uma singahlangana singenza kangcono’
UMA iqembu laseNingizimu Afrika lamantombazane aneminyaka engaphansi kuka17 lingazethemba kungenzeka lenze kangcono emdlalweni wesibili kwiNdebe yoMhlaba ebanjelwe e-Uruguay.
Abantwama bavule umqhudelwano ngokubambana ngo 0-0 neMexico eMaldonado ngoLwesibili ebusuku. Yize bekwazile ukuthola iphuzu kodwa umdlalo wabo ubungagculisi njengoba iMexico iyeke inqwaba yamathuba amagoli.
La maqembu ehlangana kulo mqhudelwano ngo2010, Abantwana bakhala ngaphansi ngo 4-0.
U-Amanda Dlamini ongumhlaziyi kanobhutshuzwayo kwiSuperSport, uthe ukholwa wukuthi leli qembu eliphekwa uSimphiwe Dludlu lisengakhuphula amasokisi.
“Engikubonile wukuthi besihlakazekile. Uma singakwazi ukuhlangana emdlalweni wethu olandelayo bese kuthi noma sifaka ibhola kumgadli wethu akwazi ukulinda ozakwabo bezomeseka, kungalunga.
“Uma nje abadlali bengayeka ukwesaba badlale ngokukhululeka bese silungisa lezi zinto singenza kangcono,” kusho uDlamini oke waba ngukaputeni weBanyana Banyana.
“Abanye bakhale ngokuthi besidlalela emuva kakhulu. Yebo kunjalo kodwa mina ngike ngithi kwesinye isikhathi akusizi ukufuna ukwenza okungaphezulu kwakho bese uziveza ubuthaka .”
Emdlalweni olandelayo kaGroup B okusasa Abantwana bazobhekana neJapan ngo-7 ebusuku ngokwesikhathi sakuleli.
Elinye iqembu abazodlala nalo yiBrazil ngoLwesibili. “Iqoqo lethu lona linzima. Mina sengikulindele ukwenza izibalo. Kodwa okuhle okwamanje wukuthi wonke umuntu unephuzu elilodwa. Bekuzoba kubi kakhulu ukube asilitholanga leli phuzu. Siyobe sisebenze kakhulu uma singadlula kuleli qoqo,” kusho uDlamini. IJapan ebicindezele ibambana ngo 0-0 neBrazil.
Ngakolunye uhlangothi ukaputeni weMexico uNicole Perez ekhuluma kwiFifa.com, uthe ubengalindele ukuthi bangabanjwa iNingizimu Afrika.
“Asiphoxekile wukuthi nje sikhathazekile ngokuthi asiwinanga. Besingawulindele lo mphumela kodwa nginokuzethemba okukhulu ngokuthi sizoyinqoba imidlalo emibili elandelayo,” kusho uPerez. IMexico izodlala neBrazil kusasa.