Bahlelelwa impesheni abadlala kwiPSL
BAHLELELWA impesheni abadlali bebhola abadlala kwiPremier Soccer League (PSL).
Lokhu kuvezwe umengameli wenhlangano ekhulumela ebadlali iSouth African Football Players Union (Safpu), uThulaganyo Gaoshubelwe.
Ngokusho kwalesi sikhulu sekubami emphinjeni ukubona izinkakha zingenayo ngisho imali yokuthenga isiqeda, ekubeni kade zidume izwe lonke zisadlala zijabulisa izigidi zabantu. Echazela Isolezwe, uGaoshubelwe uthe basebenzisana nesikhungo semfundo ephakeme i-University of Johannesburg (UJ), ekutheni bancenge uhulumeni ukuthi angakhokhisi abadlali bebhola intela efana neyawo wonke umuntu eNingizimu Afrika. Ukhale ngokuthi bakhokhiswa kakhulu abadlali bebhola. “Akufanele abadlali bakhokhe intela efana nabo bonke abantu abasebenzayo kuleli. Uzokhumbula ukuthi uma ungumsebenzi ngokomthetho wakuleli usebenza uze ube neminyaka ewu-60 noma-65. Kodwa ebholeni akunjalo, ungadlala ngisho iminyaka emibili kuphele ngawe ebholeni ngenxa yokulimala. Kungakho sithi abakhokhiswe intela encane abadlali bebhola. Sikholelwa ekutheni uhlelo lokukhokha intela kuleli luqinisa isandla kubadlali bebhola, nakubantu nje abazimbandakanya nezemidlalo ngenxa yentela emba eqolo,” kulandisa uGaoshubelwe.
Ngokusho kwalesi sikhulu, uma isicelo sabo uhulumeni esamukela (sokuthi abadlali bakhokhe intela encane), lokho kuzobe kungasho ukuthi leyo mali ezokwehliswa izobe isiya ephaketheni labadlali. “Akusho ukuthi leyo mali izoya kubadlali. Sizovula isikhwama lapho khona bonke abadlali bezoyifaka khona le mali.
Sesizithumelile izincwadi zezicelo ezinkampanini zomshwayilense ukuba zisiyalele ekutheni le mali izolondolozwa kanjani, iphinde itholakale kanjani nxa umdlali esethe khumu ebholeni. Sifuna ukuthi umdlali uma eyeka ibhola, aphunyelwe imali yempesheni. Sesikhathele ukubona ubuphofu kubadlali bethu. Empeleni nasemazweni ase-Europe kwenziwa into efanayo.”
I-Safpu isayine incwadi yesivumelwano sokusebenzisana ne-University of Johannesburg (UJ) njengoba lolu daba befuna ukuthi kuphele unyaka sekucacile ngalo.
“Sesikhulumile nePSL, namaqembu siwathintile ngoba sikholelwa ekutheni nawo kukhona azokuzuza ngalokhu esifuna ukukuqala okuthinta impesheni yabadlali. Ezinsukwini eziwu-14 kusuka manje, konke kuzobe sekucace kahle ngalolu daba. Njengamanje simatasa nophenyo esilwenza ne-UJ, ukuze sizothumela umqingo ophelele kwiziphathimandla.”