Uncome amagalelo kaHudla osethatha umhlalaphansi
USIHLALO wePremier Soccer League, u-Irvin Khoza, utuse amagalelo engwazi yezokusakaza ibhola uJoe Hudla osethatha umhlalaphansi.
UKhoza ubekhuluma emsakazweni izolo ngesikhathi uJoe ebememezela ngokusemthethweni ukuthi usethatha umhlalaphansi ngoDisemba 31.
Isolezwe labika ngokushiya kukaJoe ngoJulayi nokuyinto ayiqinisekisa kodwa wathi uzobuye achaze ngayo.
UKhoza uchaze uJoe njengomsakazi ohlale ekhuluma iqiniso ngaso sonke isikhathi.
“Ngisho ulalele njengosihlalo noma njengomqeqeshi uyezwa ukuthi into ayishoyo iyakha,” kusho u-Khoza.
Uthe wafika eGoli waba ngumakhelwane wakhe eDiepkloof esuka oNgoye ngaphambi kokulandela ezinyathelweni zoKoos Radebe ekusakazeni ezemidlalo.
UKhoza ubuye waveza ukuthi uJoe wayethanda iMoroka Swallows hhayi elinye iqembu njengoba abanye becabanga.
Uthe uthanda yena siqu sakhe nokuyikho okudida abantu futhi akukho okubi ngokweseka uma ungumsakazi.
“Ubewuqonda umsebenzi wakhe njengomsakazi ukuthi uyini. Uyakha, uyazisa futhi uyaxwayisa. Umsebenzi webhola unzima kakhulu kumele uwazi. UJoe uncwadile ngolimi lwaselokishini.”
Uthe kumele agcinwe aqeqeshe abasakazi abasha kwezemidlalo.
“Wonke umuntu unesiphiwo sakhe asinikwe wuNkulunkulu, kumele asisebenzise ngokuthembeka. Ngiyabonga ukuthi uphuma eSABC akanazinxushunxushu. Wabaleka ophikweni lakwandabazabantu kunezinkinga akazange atshele muntu ngoba ebona ukuthi kukhona okungahambi kahle. Wangena kumakhwaya nesicathamiya wagcina esekwezemidlalo. Uhamba namuhla njengomsakazi osezingeni eliphezulu.”
Uthe uzommema emhlanganweni wezikhulu zePSL ngoDisemba 20 bemvalelise ngokusemthethweni.
UJoe uthe kumfikisela izinyembezi ukuzwa inkulumo kaKhoza.
“Kwesinye isikhathi uyaye wenze nje umsebenzi ngoba uqashiwe ngaleso sikhathi. Kuyinhlanhla engandele bani ukuthi umholi okuleli zinga uKhoza akulo abeka inkulumo ngami ngingelutho.”
Uthe ibhola akaze “ngilithathe njengomsebenzi, bengilithatha njengengxenye yempilo yami”.
Isikhulu seLamontville Golden Arrows, uMato Madlala, sithe uJoe kumele azosebenzela iqembu lakhe ayovumbulula abadlali abasha.
UMfundisi Hawu Mbatha, owavumbulula ithalente likaJoe, uthe kumele avule isikole sokuqeqesha abasakazi bebhola abasha.