I-DA isingenele olwethempeli laKwaShembe eThornwood
SELUNGENELWE yiDemocratic Alliance KwaZulu-Natal udaba lokudilizwa kwethempeli laKwaShembe eThornwood.
Izolo umholi weDA KwaZulu-Natal, uMnuz Zwakele Mncwango, uthe kuwukucwasa ukudiliza ithempeli lakwaShembe eThornwood ngoba wonke umuntu unelungelo lokukhonza lapho ethanda khona futhi zonke izinkolo ziyalingana.
“Sihlele umhlangano neMenenja kaMasipala weTheku, uMnuz Sipho Nzuza, ukudingida lolu daba. Siyakugxeka ukuhlukunyezwa kwabantu ezindaweni zokukhonza ngoba umthetho uyayivikela inkolo. Sizokhuluma noNzuza ngethemba lokuthi njengoba amanye amasonto enikezwa indawo yokukhonza nebandla laKwaShembe lizonikwa indawo yalo. Selibe seThornwood iminyaka engaphezu kuka-10 futhi ibingekho inkinga kodwa iqale uma selakha indlu yokukhonza ngesitini,” kusho uMncwango.
Uthe njengoba amatende amanye amakholwa egxunyekwa kuzo zonke izindawo namaNazaretha kufanele abekelwe indawo.
USihlalo weNazarite Judicial Council, uMnuz Willington Myeni, uthe selokhu amaNazaretha anikwa indawo yaseThornwood ngo-1988 awakaze abe nenkinga kodwa iyaqala kulo nyaka.
Uthe kumanje akekho ophumela obala ukusho ukuthi uyena okhiphe umyalelo wokuthi kudilizwe isakhiwo samaNazaretha eThornwood yingakho udaba belubike nakumasipala.
Uphinde wathi ibandla laKwaShembe liye lababikela ngezingane ezivimbelwe ukuba zibhale ngenxa yokuthi bezingagundile, baphinde bakhala nangokuthi bayagundiswa emaphoyiseni.
UMncwango uphinde wakhala ngokuthi izingane ezikhonza kwaShembe zivinjelwa ukuthi zibhale izivivinyo zazo ezisezikoleni zaseMkhuze.
UMyeni uthe ezinye izingane bayazisusa ezikoleni zaseMkhanyakude baziyise kweziKwaNongoma ngenxa yokuthi ziyahlukunyezwa uma zingamaNararetha zigundwe ngenkani.
“Udaba lokugundwa kwezingane ezikoleni silubikile ehhovisi likaNkk Thoko Mkhwanazi-Xaluva ocele ihhovisi likaNdunankulu ukuthi lingenelele. Kusiphethe kabi ngoba sibikile nakwiSouth African Council for Educators (Sace) yacela ukuthi umfundi eze nombiko wamaphoyisa okhombisa ukuthi uthisha wamlimaza kanjani ngoba ngesikhathi efuna agunde ngenkani waze wamshaya,” kusho uMyeni.
UMncwango uthe bazoluyisa kwikhomishini yamalungelo abantu udaba lokuhlukunyezwa kwamaNazaretha.
UMnuz Kwazi Mthethwa, okhulumela uNgqongqoshe wezeMfundo KwaZulu-Natal, uthe bayazihlonipha zonke izinkolo wacela abazali okuhlukunyezwa izingane zabo ukuthi babikele uMnyango.