Iyamangaza eyoweBosasa kuRamaphosa: umhlaziyi
IMIBIKO yokuthi uMengameli Cyril Ramaphosa wathola uR500 000 enkampanini esolwa ngenkohlakalo iBosasa, izongcolisa isithombe azama ukusakha sokuba ngumholi olwa nenkohlakalo.
Lokhu kuvezwe uSolwazi Bheki Mngomezulu. Uthe kuyamangaza ukuthi uxhaso lweBosasa lwaluzosiza uRamaphosa emkhankasweni wokhetho kodwa namanje akazi ukuthi wobani abamnikelela.
“Amehlo athe njo kumengameli ngoba usakhe isithombe sokuthi ulwa nenkohlakalo. Lokhu kuqubula imibuzo eminingi ngoba uma abantu benikela bayabongwa, kusho ukuthi akaze abathinte labo bantu. Njengoba ethe uzophenya ukuthi wobani abanikela kufanele asale esesho nokuthi imali eyasala kwiTrust Fund yakhe yokhetho izokwenzani. Ngabe uzoyigcina noma uzonikela ngayo,” kusho uMngomezulu.
Uthe kubonakala uRamaphosa ephethwe ngendlela ehlukile uma kuqhathaniswa nabanye abaholi ngoba ne-ANC isheshe yathi uzowukhokha uR500 000.
“Angiboni ukuthi konke lokhu kuzoba nomthelela omubi okhethweni ngonyaka ozayo ngoba abavoti bakhetha umuntu abamthandayo kungakhathaleki ukuthi uziphethe kanjani. URamaphosa uzoba nenkinga yokuqinisa isitswebhu kwabanye abaholi abasolwa ngenkohlakalo kwi-ANC neyokuqeda uqhekeko ezifundazweni okuyiyona nkinga enkulu ye-ANC,” kusho uMngomezulu.
Omunye umhlaziyi wepolitiki uMnuz Ralph Mathekga uthe: “Ngibona sengathi sibuyela odabeni lwaseNkandla kodwa umehluko wukuthi kulokhu umuntu othintekayo akabuzwa imicikilisho yokuthi kungani engazazi izinto ezithinta yena. Isithombe sikaRamaphosa sokuba wumuntu ongazwani nenkohlakalo sesingcolile. Ngiyacabanga ukuthi obengundunankulu eNorth West uMnuz Supra Mahumapelo uhleka yedwa manje,” kusho uMathekga.
Uthe uyathemba ukuthi uRamaphosa ukhulume iqiniso lodwa waveza yonke imininingwane ngeBosasa ngoba uma kukhona akufihlayo amaqembu aphikisayo azomthwalisa kanzima.
Umholi weDA uMnuz Mmusi Maimane uthe uRamaphosa kufanele ajube ithimba elizophenya inkohlakalo yaseBosasa futhi ajezise abathintekayo kuyo.
UMnuz Mkhuleko Hlengwa okhulumela i-IFP kuzwelonke uthe bafuna uSomlomo uNksz Baleka Mbete aphenye uRamaphosa ngokuqamba amanga ePhalamende ngoba akwamukelekile ukuthi umengameli wezwe akhohlise abantu.