Othisha banxuswa ukubheka uchatha kuma-payslip abo
IZINYUNYANA zothisha KwaZulu-Natal zibanxusa ukuthi babheke ama-payslip abo ukuze babone ukuthi ingenile yini imali engu-1% ye-Integrated Quality Management System (IQMS) kule nyanga.
I-IQMS wuhlelo lokuklomelisa othisha olwenziwa minyaka yonke ngokubanika u-1% emholweni wabo.
UNobhala weSadtu esifundazweni, uNksz Nomarashiya Caluza, uthe le mali bekumele ingene ngoJulayi nonyaka kodwa uMnyango wezeMfundo wathu kukhona osakulungisa.
Uthe bakhona abayitholile imali abanye abakayitholi. “Sizoqhubeka siphoqe umnyango ukuthi ukhokhele othisha imali yabo. Bekumele bathole u-1.3% kodwa abanye bathola u-1%. U-0.3 % kuthiwa basazowuthola,” kusho uNksz Caluza.
Uthe umnyango kumele ukhokhele labo ongakabakhokheli.
UMengameli weNatu, uMnuz Allen Thompson, uthe othisha kumele baqinisekise ukuthi imali bayitholile.
Uthe sebecele umhlangano nenhloko yomnyango uDkt Enock Nzama ngalolu daba.
“Othisha abaqhathanise ama-payslip abo angonyaka odlule neyalo nyaka ukuze babone ukuthi imali yabo inyukile. Imali kumele inyuke kabili ngonyaka, okokuqala uma kunyuka eyabasebenzi bonke bakahulumeni nangoJulayi uma sebethole eye-IQMS,” kusho uThompson.
Uthe u-1% usho ukuthi uthisha ohola u-R300 000 ngonyaka bekumele athole uR15 000 ngale nyanga we-IQMS.
“Abangayitholanga abasithinte ngokushesha ngokwezifunda ukuze indaba yabo isheshe. Akumele barojwe ngale ndlela othisha ngoba sifuna ukwazi ukuthi imali yothisha iyaphi,” kusho uThompson.
Okhulumela umnyango, uMnuz Kwazi Mthethwa, uthe ngokombiko abawutholile othisha bayitholile le mali ye-IQMS.
“Sikhokhe u-1% njengoba bekumele bathole u-1.3%. Eka-0.3% isaxoxwa indaba yayo, kuzothi uma sekuvunyelwene ngayo bese siyikhokha. Abantu ababhekisise ama-payslip abo,” kusho uMthethwa.