‘Ngeke baphumelele abangidicilela phansi’
IMEYA yoMkhandlu waseZululand uMfundisi Thulasizwe Buthelezi ishaya phansi ngonyawo ithi labo abaqhuba umkhankaso wokungcolisa igama layo ngeke baphumelele.
Ekhuluma nabezindaba ngemuva kokunikela ngezimbewu zikabhontshisi nommbila, izingubo zokulala, amabhodwe, izitofu namajezi ebhola kubantu baseDumbe ngoMgqibelo, uButhelezi uthe uyazi ukuthi abantu abaqhuba lo mkhankaso bangaphakathi eqenjini labo.
Uthe isikhulu somkhandlu okuyiso esisabalalise lezi zindaba sesiyaziwa.
“Into engidalele isigcwagcwa esikhulu ukudalula inkohlakalo ebiyenziwa yiNFP ne-ANC nokuxosha imenenja yomkhandlu emsebenzini uMnuz Sipho Nkosi,” kusho uButhelezi.
Uthe ulindele ukuthi laba abasabalalise lezi zindaba zokuthi uboshiwe bathathelwe izinyathelo.
“Ukudicilela isithunzi sami akuthinti mina ngedwa kuthinta nomndeni wami nomdeni wakwaDlamini owafelwa yindodana yawo,” kusho uButhelezi.
Uthe lokhu kuhlasela akubhekisiwe kuyena kodwa kubhekiswe eqenjini iNkatha.
“Mina ngiyaqhubeka nomsebenzi wami wokuhambisa izidingo kubantu, njengoba ngiseDumbe namhlanje (ngoMgqibelo) ngizokhuthaza abantu ukuthi balime ukuze kuliwe nendlala, abantu balapha bebesalele emuva ngentuthuko into abakhala ngayo kakhulu amanzi esesiqalile ukuwafaka njengase-ward 2 kanti ngenyanga ezayo siya eBilanyoni,” kusho uButhelezi.
Ngasekupheleni kwesonto eledlule, kusabalale imibiko ethi uButhelezi uboshiwe wabuye wadedelwa mayelana necala lokubulawa kwekhansela labo uMnuz Sibuyiselo Dlamini owadutshulwa oLundi ezinyangeni ezimbalwa ezedlule.
Bekubikwa ukuthi ngoLwesihlanu uButhelezi uvela eNkantolo yeMantshi yaseMahlabathini kodwa lokho kwangenzeka njengoba ngalolu suku kade ebhizi neMeya yasoLundi uMnuz Wilson Ntshangase nomengameli weqembu inkosi Mangosuthu Buthelezi bethula izinhlelo zentuthuko oLundi.
Inkosi Buthelezi ithe iphatheke kabi ngoba yonke le nto iphekwa ngamalungu abo. “Into engiphakathi kabi kakhulu wukuthi lezi zinto zenzeke ngesikhathi lapho sengithi ngithatha khona umhlalaphansi,” kusho umntwana wakwaPhindangene. Uthe iqembu labo liyayeseka imeya yaseZululand. “Yonke le nto yenziwa ngamakhansela ethu angahambisani nokuthi kuqashwe imenenja entsha yomkhandlu, phakathi nesonto ngithole incwadi ebingavezi ukuthi iphuma kuphi ingibikela ukuthi kuboshwe imeya yaseZululand, ngaxhumana nemeya yangikhombisa ukuthi nayo iyitholile leyo ncwadi, lowo muntu obethumele incwadi ezifihla ngebhadi ukhohliwe ukuyicima kwikhompyutha yakhe sesiyazi ukuthi ungubani,” kusho inkosi Buthelezi. Uthe ngisho uNgqongqoshe wamaPhoyisa uMnuz Bheki Cele ufonele usihlalo wabo kazwelonke uMnuz Blessed Gwala emtshela ukuthi akangitshele ukuthi lezi zindaba engizizwayo ngemeya yethu azikho.