Ithemba lempilo engcono kofunda ejele
KUNYUKE ithemba ngempilo engcono esiboshweni esaphothula u-matric ejele sabe sesiqhuba izifundo njengoba sesizophothula ezobuthisha.
USiyabonga Mtambo (27) waseMlaza waboshelwa icala lokubamba inkunzi wagwetshwa iminyaka engu-15 ebhadla ejele.
Wayeneminyaka engu-19 ngesikhathi eboshwa okwenza wafuna ukuqhuba izifundo zakhe ukuze abe nempilo engcono.
“Ngafika ngenza uGrade 11, ngaphasa kahle. Ngo-2016 ngaphasa u-matric ngeBachelor. Emuva kokuphasa kahle ngakhetha ukufundela ukuba uthisha. Kumanje ngenza unyaka wesibili ezifundweni zobuthisha. Ukuthola u-matric ngisejele kwanginikeza ithemba lokuthi impilo yami ingaba ngcono uma sekufike isikhathi sokuba ngiphumele ngaphandle,” kusho uMtambo.
Uthe yize ezishaya isifuba ngempumelelo ayizuzile yize eboshiwe kodwa uxwayisa abangakangeni ejele ukuba bengalokothi njengoba impilo inzima ejele.
“Engingakujabulela ukuba abanye abafowethu abangaphandle abangakangeni ejele bangalokothi ngoba ijele alilihle futhi akulula. Noma sifunda kunzima, ziningi izinto ezimbi ngejele,” kusho uMtambo.
Isolezwe belikhuluma naye ngeledlule ngesikhathi esikoleni sejele laseWestville, i-Usethubeni kubhalwa izivivinyo zika-matric.
Uthe uyabasiza abanye abafundi bakulesi sikole njengoba vele enza izifundo zobuthisha. Esinye isiboshwa esifuna ukulandela ezinyathelweni zikaMtambo, uSphamandla Shabangu (24) ofuna ukuqhuba izifundo zakhe zeFashion Design uma eseqede u-matric. UShabangu waseMontclair oboshelwe icala lokuntshontsha esitolo, ubengomunye wabafundi abangu-28 abebebhala izivivinyo zika-matric. “Ngiyazethemba ukuthi ngizophasa ngikwazi ukuqhuba izifundo zami ngibe wumsiki wengqephu njengoba ngifuna ukwenza iFashion Design.
UShabangu wagwetshwa iminyaka emithathu, usehlale ejele iminyaka emibili nezinyanga eziyisithupha.
Bekumele aphume ngo-Ephreli nonyaka ejele kodwa ngenxa yokuthi ubefuna ukuqhubeka nokufunda wahlala ejele kuze kube ubhala izivivinyo zakhe zika-matric.
Ejele laseWestville imfundo ngenye yezinto okuthiwa zihamba phambili njengoba kukhona iziboshwa esezathola amaDegree, Masters ezinye zenza namaPHD.