UDludlu akakalilahli ithemba ngesigaba somkhumulajezi
AKAKALILAHLI ithemba lokuthi Abantwana basengadlulela esigabeni somkhumulajezi kwiNdebe yoMhlaba uSimphiwe Dludlu opheka iqembu lesizwe lamantombazane aneminyaka engaphansi kuka-17.
UDludlu ubekhuluma nabezindaba ngemuva kokuthi Abantwana bebhudluzwe yiJapan ngo 6-0 emdlalweni wesibili kulo mqhudelwano e-Uruguay.
Kusasa Abantwana bazodudulana neBrazil (ngo7 ebusuku) abalinganayo nayo ngephuzu elilodwa. IBrazil, evule umqhudelwano ngokubambana ngo 0-0 neJapan, ngempelasonto ihlulwe yiMexico ngo 1-0.
IJapan neMexico abadlalayo nabo kusasa babambene ngamaphuzu amane.
“Angikwazi ukubanqamuleza abadlali bami ngoba nakhu sihlulwe ngo 6-0. Into ekhona wukuthi sidlala namaqembu angcono kakhulu kunathi okusho ukuthi kumele sisebenze kanzima ngokuphindiwe. Kumele baqhubeke nokulwa emdlalweni olandelayo ngoba akukapheli kuze kube kuqedwa imidlalo yangoNovemba 20,” kusho uDludlu.
Mancane amathuba okuthi Abantwana badlulele kumaquarterfinal. Ancike ekutheni, ngenxa yamagoli amaningi, iJapan ishaye iMexico bese Abantwana babhudluze iBrazil kungangeni lutho ngakubo.
UDludlu uthe yize beshaywe ngo 6-0 kodwa ubona ubungcono endleleni yokudlala kunakwiMexico abayibambe ngo 0-0 ngoba akhona amathuba ambalwa abawakhile.
“Akhona amathuba ambalwa esiwakhile. Ukube siwasebenzisile besingashaya okungenani amagoli amabili,” kusho uDludlu. Phezu kwakho konke uthe umqhudelwano uyindlela yokubona igebe elikhona phakathi kweqembu laseNingizimu Afrika namanye amazwe ekuthuthukiseni abadlali.
Kuyo iNdebe yoMhlaba, iGhana idlulele kuma-quarterfinal ngemuva kokunqoba yomibili imidlalo yamaqoqo. Ishaye i-Uruguay ngo 5-0, yalandelisa ngeFinland ngo 3-1.
ICameroon inqobile emdlalweni wesibili ihlula iGermany ngo 1-0 ngemuva kokuvula ngo 3-0 ishaywa yi-USA.