IDurban Heat ikuzwele ukushisa kwiBlitz

IVULE ngesibhaxu iDurban Heat yaseThekwini ishaywa yiCape Town Blitz emdlalweni wayo wokuqala emqhudelwaneni we-T20, iMzansi Super League (MSL).

I-Heat ithelwe othulini ngamawikhethi amathathu (kusasele amabhola amahlanu) phambi kwabalandeli bayo izolo.

ICape Town Blitz iyona ewine i-toss yakhetha ukuqala ngokushwiba. Aliqalanga kahle iqembu lasekhaya iDurban Heat ngenxa yokuthi uHashim Amla, obevula, noMorne van Wyk abadlalanga kahle. U-Amla ukhishwe enze ama-run awu-15, kwathi uVan Wyk waphuma eshaye awu-26.

Kuthuke abaningi enkundleni uSarel Erwee noTemba Bavuma bekhishwa ngamadada ngokulandelana. U-Anrich Nortje weBlitz uthathe amawikhethi amane (Amla, van Wyk, Erwee noBavuma).

Nokho ukaputeni weHeat u-Albie Morkel noKhaya Zondo bayibambe ishisa, bephendula ezitheni. UMorkel ugcine efike kuma-run awu-45 wakhishwa nguFerisco Adams kwathi uZondo uyena owenza ama-run amaningi njengoba efike kwawu-49 engakhishiwe. Kuphele ama-over eHeat yenze u-157/ 5.

Kube sekungena iBlitz, eqale kahle uDawid Malan noJanneman Malan bethwalisa kanzima abashwibi beHeat. Nokho nge-over yesihlanu uMarchant De Lange uwuqede wonke lowo mcimbi ekhipha uDawid enze ama-run awu-12.

UKeshav Maharaj ukhombisile ukuthi ungakubo ngesikhathi ekhipha uJanneman ngebhola lakhe lokuqala. UJanneman uphume enze ama-run awu-31. Ngebhola lakhe lesibili, uMaharaj ukhiphe uKyle Verreynne obesenze ama-run ayisithupha.

Akagcinanga lapho uMaharaj, njengoba ethole newikhethi kaMohammad Nawaz ophume enze ayisishiyagalolunye nge-over ka-12.

Kube sekugadla uVernon Philander kwiHeat, okhiphe insizwa yaKwaZulu-Natal uSibonelo Makhanya esagijime kabili kuphela.

U-Asif Ali weBlitz, obeseyithemba lezivakashi, ugcine enze 80. Ugcine ekhishwe uKyle Abbot. Ngasekugcineni uDe Lange uthole iwikhethi yakhe yesibili ekhipha uFerisco Adams enamarun ayisithupha.